- A eurodeputada galega coñeceu de primeira man as reivindicacións do pobo irlandés ante o inicio das negociacións para a saída do Reino Unido da UE
- Durante dous días reuniuse con representantes políticos e colectivos sociais e asistiu a un evento para pedir un estatus especial para o Norte de Irlanda coa UE
Bruxelas, 1 de abril de 2017. A eurodeputada galega Lídia Senra, integrada no Grupo Confederal da Esquerda Unitaria Europea/Esquerda Verde Nórdica (GUE/NGL), desprazouse a Irlanda o xoves e o venres desta semana xunto a outros eurodeputados e eurodeputadas para participar na campaña do Sinn Féin en defensa do dereito a decidir do pobo irlandés no proceso de negociación para a saída do Reino Unido da UE, logo de que o pasado mércores o goberno británico iniciara o procedemento para o Brexit. Durante dos días, Lídia Senra puido coñecer de primeira man as preocupacións e esixencias do pobo irlandés, que votou pola permanencia na UE, igual que Escocia, e que rexeita a imposición dunha fronteira entre o norte e o sur do país que vulnere os Acordos de Venres Santo sobre os que se asentou o proceso de paz aínda en curso.
“É hora de que Bruxelas e os Estados membros implicados asuman o dereito a decidir dos pobos e a decisión que tomaron co seu voto Irlanda e Escoia. A vontade expresada por estes pobos debe ser respectada, igual que a dos que apoiaron a saída da UE”,defendeu a eurodeputada galega durante a reunión pública organizada en Dundalk o xoves pola noite para rexeitar a imposición dunha fronteira que limite a liberdade de movemento entre o norte e o sur do país como consecuencia do Brexit.
Deste xeito, Senra quixo prestar o seu apoio ás reivindicacións do polo irlandés dun estatus especial para o Norte de Irlanda cando o Reino Unido abandone a UE, xa que toda decisión que non garanta na súa totalidade o cumprimento dos Acordos de Venres Santo suporía un duro golpe á consolidación da paz. Esta foi a mensaxe que trasladaron aos eurodeputados e eurodeputadas colectivos como West Belfast, un partenariado de proxectos para a rexeneración da convivencia e do benestar da cidade que traballa directamente con vítimas do conflito, antigos presos políticos e coas novas xeracións en risco de exclusión pola falta de emprego e a precariedade.
“Defendemos o dereito a decidir e defendemos tamén a fin das políticas neoliberais que están na base do rexeitamento da UE por parte da cidadanía. Necesitamos outra Europa que se construa sobre a base do dereito a decidir dos pobos e que poña os dereitos humanos por diante dos intereses do capital”, apuntou tamén a eurodeputada.
O encontro con membros da Asemblea do Norte de Irlanda, situada en Stormont, nos arredores de Belfast, puxo punto final á visita. Esta próxima semana debaterase e votarase no pleno do Parlamento Europeo, en Estrasburgo, a resolución da Eurocámara coas directrices para a futura negociación do Bréxit. “Este texto fixará as prioridades da Eurocámara na negociación, e entre elas debe estar o cumprimento da vontade expresada polo pobo irlandés mediante o seu voto no referendo de 2016 e o respecto ao dereito a decidir”, recalcou Senra.
