- A eurodeputada galega inaugurou este sábado pola mañá no Concello de Bande a xornada “A Vía Nova: Un camiño de Europa”
- Critica a falta de compromiso das institucións galegas e municipais coa protección dos recursos arqueolóxicos e coa defensa do medio rural
Bande, 29 de abril de 2017. A eurodeputada galega Lídia Senra, integrada no Grupo Confederal da Esquerda Unitaria Europea/Esquerda Verde Nórdica (GUE/NGL), inaugurou este sábado pola mañá no Concello de Bande (Ourense) a xornada informativa e de debate “A Vía Nova: Un camiño de Europa”. Ante medio cento de persoas que están a participar na xornada, Senra chamou a rachar coas “actuais políticas de abandono e desleixo por parte da Xunta e da maioría dos concellos galegos” e a impulsar este camiño primitivo que vai desde Braga a Astorga, pasando pola provincia de Ourense, aproveitando que o 2018 será o Ano Europeo do Patrimonio Cultural.
A parlamentaria criticou o “desinterese” que amosan as institucións públicas pola Vía Nova e relacionou este feito coa situación que atravesa a día de hoxe todo o rural. “Este abandono do noso patrimonio cultural está moi ligado ao abandono do noso medio rural. Parece que aos poderes públicos non lles importa nada nin unha cousa nin a outra. De feito, vemos a diario políticas que pensan cada vez máis en manter as grandes industrias e promover o avance do capitalismo, fronte á defensa do pobo e do rural, que é polo que se debería apostar, xa que ademais de manter vivas estas zonas, contribúe a conservar o patrimonio”.
Senra explicou, durante a súa intervención, que o xoves desta semana aprobouse no pleno do Parlamento Europeo, en Estrasburgo, proclamar o 2018 como Ano Europeo do Patrimonio Cultural e fixo unha chamada ás autoridades galegas “para que se poñan as pilas e aproveiten, se é que até o de agora estiveron durmindo, a oportunidade que vai blindar este feito”. “Que aproveiten o financiamento co que estará dotado o Ano Europeo do Patrimonio Cultural -8 millóns de euros-. A promoción e conservación da Vía Nova debe formar parte das actividades deste Ano Europeo”, defendeu.
Así mesmo, a eurodeputada comprometeuse a “facer todo o que teña nas miñas mans” para que o Parlamento Europeo e a Comisión Europea coñezan a realidade da Vía Nova. “Analizaremos a situación e apoiaremos todos os esforzos que están a facer diferentes asociacións para visibilizar a Vía e que se coñeza”, dixo.
Pola súa banda, Davide Pérez López, arqueólogo e vogal de Cultura da Asociación de Montaña Arnau, que colaborou na organización desta xornada, cualificou a Vía Nova como “un tesouro” e reclamou un “futuro viable” para este camiño. Pérez defendeu que potenciar a Vía Nova significaría tamén dinamizar toda a comarca da Baixa Limia e toda a provincia e reclamou que se acondicione axeitadamente todo o camiño, con paradas e albergues ao longo de todos os lugares polos que pasa a Vía, desde Portugal, até a Baixa Limia, Celanova, Alto Arnoia, Terras de Caldelas, Montaña de Trives, Valdeorras e o Bierzo.
A xornada, de acceso aberto e sen necesidade de inscrición previa para todos os públicos, prolongarase durante todo o sábado. Ao longo de diferentes mesas estase a reflexionar sobre a quen lle interesa a falta de posta en valor da Vía Nova e tamén se aborda reclamar que a Vía Nova sexa declarada Patrimonio da Humanidade pola Unesco. Para iso, cómpre unha maior visibilización e protección e recuperación.
Nas exposicións da mañá están a intervir relatores como Santiago Ferrer Sierra, arqueólogo de Valdeorras, pertencente ao Grupo Arqueolóxico Larouco; Manuel García Valdeiras, arqueólogo profesional da Limia; Manuel Rivero Pérez, antropólogo e voluntario social; Marta Delgado González, responsable de Mira Xurés; Toño Monteiro, escultor e membro da Asociación Medioambiental Xuresianos-Geresianos AXUGE; e Xavier Perdiz, presidente da Asociación de Montaña Arnau, entre outros.
Xa pola tarde, ás 16:00 horas, comezará un percorrido a pé pola Vía Nova. O punto de quedada para o inicio do roteiro será nos Miliarios Romanos da Ponte Nova, na serra do Xurés. O traxecto a pé comprenderá ao redor de 3 quilómetros, con diferentes paradas explicativas ao longo do camiño.
