- A eurodeputada participou hoxe no Parlamento Europeo na xornada crítica coa actual PAC, na que estivo de relatora Isabel Vilalba do SLG
- Defende que o debate na UE debe ir cara a definir que política agraria e alimentaria é mellor e non só centrarse no reparto de axudas
Bruxelas, 7 de febreiro de 2017. . Lídia Senra, eurodeputada galega integrada no Grupo Confederal da Esquerda Unitaria Europea/Esquerda Verde Nórdica (GUE/NGL), reivindicou hoxe en Bruxelas a soberanía alimentaria e o dereito dos pobos a decidir as súas políticas agrarias e alimentarias, sen prácticas de dumping por parte de terceiros países. Tamén reclamou o dereito dos labregos e labregas de cada país a producir os alimentos básicos para os seus pobos. Así o defendeu no Parlamento Europeo este martes pola mañá, na xornada “Soberanía alimentaria dentro da nova Política Agraria Común”, organizada polo Grupo Confederal da Esquerda Unitaria Europea/Esquerda Verde Nórdica (GUE/NGL), na que participou como moderadora.
Durante o primeiro panel da xornada, titulado “Soberanía alimentaria na UE”, no que tamén interveu como relatora a secretaria xeral do Sindicato Labrego Galego (SLG), Isabel Vilalba, Senra destacou a importancia de que as forzas políticas de esquerda “introduzamos no centro do debate a soberanía alimentaria e a PAC”. “Penso que a PAC ten que ir moito máis alá de reducirse, como sempre pasa, a que na Comisión só se debata sobre as axudas e sobre como se vai distribuír o diñeiro. Iso é importante, pero primeiro hai que definir que política agraria e alimentaria queremos e despois falar de canto diñeiro precisamos para aplicala”, dixo a europarlamentaria galega. Igualmente, Lídia Senra defendeu a soberanía alimentaria como unha proposta beneficiosa non só para o campesiñado, senón para toda a sociedade.
Pola súa banda, na súa quenda de palabra, Isabel Vilalba fixo un repaso de cifras e situacións alarmantes na actualidade. A secretaria xeral do SLG reclamou prezos xustos e ingresos dignos para as produtoras e produtores agrarios para atallar situacións de fracaso vital como se están a ver no sector lácteo, por exemplo. “Temos unha política agraria errática”, denunciou a secretaria xeral do SLG, que criticou o modelo cara ao que se está camiñando de destrución das pequenas e medianas explotacións. “En Soria está prevista unha granxa de leite de 22.000 vacas, que viría a substituír a máis de 430 granxas medianas. A onde imos ir parar?”, preguntouse Vilalba, que atacou o feito de que ás labregas e labregos pequenos“obrígannos a pensar que temos que vivir con prezos ruinosos que non nos permiten ter un medio de vida”.
A dirixente sindical galega tamén fixo mención a que cada vez son máis as persoas que teñen dificultades para acceder a unha boa alimentación de calidade e o máis grave é que cada vez a alimentación está máis relacionada con problemas graves para a saúde. “Unhas 25.000 mortes de persoas cada ano en Europa están relacionadas coa resistencia a antibióticos, relacionada en gran medida no abuso de antibióticos que se usan na alimentación animal”, denunciou Isabel Vilalba, para engadir que “non se pode permitir que 1 de cada 3 mulleres e 1 de cada 2 homes imos ter un cancro ao longo da nosa vida e o factor fundamental é a alimentación”. Neste sentido, alertou sobre a presenza de nitratos nos ríos (41% dos acuíferos en Cataluña) e nas augas que chegan á cadea alimentaria, de restos de glifosato no sangue das persoas e atacou a presenza de transxénicos nas mesas da maior parte dos consumidores e consumidoras.
Nun marco global, Vilalba chamou tamén a ir cara a modelos de decrecemento de consumo de enerxía. “Cando falamos de soberanía alimentaria falamos do dereito humano fundamental a ter unha alimentación boa e a recuperar a democracia real para os pobos”, dixo, para concluír reivindicando o papel das mulleres na agricultura e animando a “responder ás demandas sociais de saúde, emprego e sostibilidade, nun marco axeitado para o futuro.
Pola súa banda, Geneviève Savigny, do Comité de Coordinación Europea Vía Campesina, e Joris Lohman, membro do Consello Executivo de Slow Food, defenderon que é necesario producir dunha forma máis cercana e controlada polas persoas. “Na produción alimentaria necesitamos máis democracia, non menos. Necesitamos unha resposta aos problemas concretos e dar pasos para conseguir unha política agroalimentaria que sexa máis integradora e sostible”, dixeron.
Gianni Tamino, profesor na Universidade de Padua, criticou a actual globalización, que fai que os agricultores e agricultoras perderan o control da produción e do consumo agrario fronte ás multinacionais. Igualmente, chamou a dicir non aos pesticidas e aos transxénicos e foi crítico co “engano da produtividade industrial”, xa que “estamos expropiando aos agricultores e agricultoras e pobos o control da produción dos seus alimentos”.
Eva Torremocha, experta en agroecoloxía, investigadora na Universidade Pablo de Olavide, falou do concepto de economía circular e defendeu a autonomía e eficiencia enerxética, “economía circular con xestión social”. “Con soberanía alimentaria poderemos aportar solucións ao cambio climático desde as nosas prácticas sostibles”, avogou.
