Lídia Senra alerta á CE sobre o novo emisario submarino e a ampliación da depuradora dos Praceres

Advirte que o plan que pretende Augas de Galicia e que cofinanciaría nun 80% o Feder, non garante o cumprimento da Directiva de augas residuais

A eurodeputada denuncia falta de transparencia e reclama unha alternativa consensuada coa veciñanza que permita o saneamento da ría de Pontevedra

Santiago, 23 de xaneiro de 2019. A eurodeputada galega Lídia Senra ven de alertar á Comisión Europea (CE) sobre a posibilidade de que os proxectos que pretende por en marcha Augas de Galicia co novo emisario submarino e a ampliación da depuradora dos Praceres, en Lourizán (Pontevedra), non solucionen os problemas de mal tratamento das augas residuais na ría de Pontevedra e leven de novo ao incumprimento da Directiva 91/272/CE de augas residuais urbanas e a continuar poñendo en risco a saúde pública e ambiental. A europarlamentaria rexistrou hoxe en Bruxelas dous escritos dirixidos á CE, elaborados tras a reunión que mantivo hai unhas semanas^¹ con membros da Plataforma veciñal Non á ampliación da depuradora dos Praceres.

No primeiro deles^², Lídia Senra pregúntalle á CE que coñecemento ten a Comisión dos novos proxectos de saneamento para a ría de Pontevedra e que valoración fai dos mesmos, tendo en conta que, de ir para adiante, probablemente se estará investindo unha notable cantidade de fondos europeos que redundarán en aniquilar aínda máis o xa deteriorado lugar.

Senra lembra que o Tribunal de Xustiza da UE ratificou no 2016 o incumprimento reiterado do tratamento das augas residuais na ría de Pontevedra, tras a denuncia emitida pola CE contra o Estado español polo indubidable risco para a saúde pública orixinado polo deficiente saneamento desas augas. O Estado español debería ter resoltos no 2023 os problemas orixinados pola desbordada depuradora dos Praceres que dá servizo á poboación de Pontevedra, Marín, parte de Poio, Vilaboa e o Polígono Industrial da Reigosa (Ponte Caldelas).

No 2018, Augas de Galicia deu a coñecer o proxecto de novo emisario submarino e anunciou a súa intención de realizar a ampliación da EDAR actual, obras que serían cofinanciadas nun 80% con fondos europeos FEDER. O novo emisario submarino contemplado, que recibiu máis de 300 alegacións en contra da veciñanza e de asociacións, prevé que as novas instalacións estean situadas no mesmo lugar dos Praceres, ocupando novos terreos do Dominio Público Marítimo Terrestre, sen respectar a distancia mínima de 200 metros das vivendas e afectando directamente aos bancos marisqueiros de Lourizán, Raxó, Lourido, San Telmo e Bueu, o que agravará os problemas de contaminación que xa soporta agora a zona. Apóstase tamén por alonxar o punto de vertido das augas residuais dentro da ría, o que non evitará a contaminación por E. Colli; e deixa o mesmo punto de vertido para as augas residuais de Ence, sen ter en conta a contaminación do Nitróxeno orgánico e amoniacal, o Fósforo total e a Demanda Biolóxica de Osíxeno (DBO), “polo que podemos atoparnos coa sorpresa de que, realizado este enorme novo investimento, persista o incumprimento da Directiva 91/271/CE de augas residuais urbanas”, considera Senra.

No segundo dos escritos rexistrados hoxe no Parlamento Europeo^³, a eurodeputada denuncia que o núcleo dos Praceres leva anos practicamente encaixonado e sufrindo todo tipo de consecuencias medioambientais e sociais negativas derivadas de diferentes actividades industriais. Alí ubícase a pasteira Ence, a depuradora que dá servizo a gran parte dos concellos da ría de Pontevedra, os recheos do porto de Marín, declarados ilegais polo Tribunal Supremo, a coñecida como Autovía de Marín e o scalextric dos Praceres, e o paso do tren polo medio da praza dos Praceres. Senra considera que os proxectos de novo emisario e a ampliación da depuradora serían un agravante maior e informa á CE sobre a falta de transparencia e de acceso á información, xa que saíu a exposición pública o anteproxecto de novo emisario, no que se fai constantemente referencia ao proxecto de ampliación da depuradora, sen que este se coñeza, o que vulnera as garantías democráticas.

Tendo en conta que na actual depuradora se tratan tamén as augas residuais procedentes do porto de Marín e do Polígono Industrial da Reigosa, a eurodeputada pregunta á CE se considera que se está a cumprir a normativa en materia de depuración de augas para as industrias alimentarias, dados os problemas engadidos de sumar as augas industriais ao saneamento das augas domésticas.

Senra súmase á reivindicación da plataforma veciñal e reclama a necesidade dun estudo integral do saneamento da ría de Pontevedra e a búsqueda de alternativas que sexan consensuadas e que aseguren un modelo de saneamento racional e sostible, que permita aliviar a Lourizán das continuas agresións ambientais e sobre o territorio e o mar.