- Audiencia de expertas/os na Comisión de Agricultura para abordar medidas excepcionais de mercado para limitar a produción láctea
- Senra coincidiu con Vilalba (SLG e CEVC) en denunciar que as medidas postas en marcha pola UE até o momento foron “un completo fracaso”
Bruxelas, 26 Maio 2015. Durante o serán e noite de onte a Comisión de Agricultura do Parlamento Europeo, na que a eurodeputada de Alternativa Galega de Esquerda en Europa (AGEe), Lídia Senra, é titular para o Grupo da Esquerda Verda Nórdica-Esquerda Unitaria Europea (GUE/NGL), organizou unha audiencia pública baixo o título Medidas excepcionais de mercado para limitar a produción láctea.
Entre as expertas/os convidados, a voz do pequeno e mediano campesiñado europeo estivo por Isabel Vilalba, Secretaria Xeral do Sindicato Labrego (SLG), en representación da Coordenadora Europea Vía Campesina (CEVC), organización proposta por Lídia Senra para participar neste espazo.
Vilalba evidenciou a nula eficacia do enfoque das institucións europeas en relación ao sector leiteiro -nomeadamente a aplicación do denominado Paquete Lácteo e o fin das cotas leiteiras-, “o sector lácteo da UE está a padecer unha caída continuada dos prezos en orixe dende inicios de 2014”.
Os datos dispoñibles correspondentes ao primeiro trimestre de 2016, revelan un prezo medio de 27’72 céntimos por litro, pero a realidade é moito máis preocupante, aclarou, “na Galiza hai máis de 500 granxas que están a vender o leite por baixo dos 20 céntimos e unhas 2.000 non superan os 25 céntimos”. Unha situación insostíbel que se traduciu na desaparición de 900 explotacións leiteiras tan só no último trimestre do ano 2014.
Para frear este descenso no prezo do leite, “cómpre unha baixada da produción xeralizada e obrigatoria e apostar por un modelo resiliente”. En relación aos contratos, Isabel Vilalba reiterou a necesidade de fixar un prezos mínimos que cubran custes de produción e remuneren o traballo.
“Temos que apostar por unha política pública que regule os prezos e garanta que a cidadanía identifique o leite como un produto nutritivo e de calidade”, alentou. “As políticas lácteas europeas estannos afogando”, resumiu con contundencia a representante da CEVC.
A eurodeputada de AGE, encetou a súa intervención advertindo “é lamentábel que a única proposta posta enriba da mesa por parte do Consello sexa agardar a ver a luz ao final do túnel”. Senra cuestionou duramente a resposta dada dende as institucións europeas á crise do sector leiteiro: “como é posíbel que facendo tantos estudos a Comisión Europea non fora capaz de prever que ía haber un exceso de produción, cando dende o sector organizacións como a Coordenadora Europea Vía Campesina se lles estaba repetindo constantemente?”, inqueriu.
“É fundamental reflexionar e pensar seriamente que medidas podemos adoptar para axustar a oferta á demanda. Non se pode deixar a produción leiteira en mans das grandes multinacionais”, espetoulles Senra.
Intervención da Secretaria Xeral do SLG, Isabel Vilalba, en representación da Coordenadora Europea Vía Campesina
Intervención de Lídia Senra, eurodeputada de AGEe e titular no Grupo da Esquerda Unitaria Europea-Esquerda Verde Nórdica (GUE/NGL) na Comisión de Agricultura do Parlamento Europeo.
