- Lídia Senra asina unha carta con máis de 50 eurodeputadas/os denunciando a concentración do mercado mundial de sementes e praguicidas
- A misiva advirte que a CE está facultada para rexeitar este tipo de acordos que reducen a competencia e fortalecen posicións dominantes
Santiago, 23 setembro 2016. Lídia Senra, eurodeputada de Alternativa Galega de Esquerda en Europa (AGEe), e pertencente ao Grupo Confederal da Esquerda Unitaria Europea/Esquerda Verde Nórdica (GUE/NGL), ven de asinar, xuntos con outros máis de 50 eurodeputados e eurodeputadas, unha carta dirixida á comisaria europea de Competencia, Margrethe Vestager, na que lle reclaman que prohiba a adquisición de Monsanto por parte de Bayer por tratarse dun “acordo perigoso”. Na misiva, advirten que a Comisión Europea (CE) está facultada para rexeitar este tipo de acordos, tendo en conta que, segundo o artigo 2 do Regulamento 139/2004, se recolle que as adquisicións deste tipo están prohibidas se contribúen a reducir de forma significativa a competencia no mercado único mediante o fortalecemento dunha posición dominante”, como é o caso.
O pasado 14 de setembro, o grupo farmacéutico alemán Bayer anunciou que comprará a fabricante de sementes estadounidense Montasanto por 59 millóns de euros e o volume de negocios mundial de Monsanto e Bayer é moito maior do umbral de 5 millóns de euros previstos no citado Regulamento. Ante tal realidade, as e os asinantes da carta aseguran que isto “permite á CE desencadear unha investigación, xa que o seu volumen conxunto sería de 23 millóns de euros. Por outra parte, o volume de negocios total a escala comunitaria de cada un é de máis de 250 millóns de euros e estas dúas empresas están operando en parte nos mesmos mercados: o das sementes e o dos praguicidas.
Na misiva asinada por Lídia Senra faise referencia a que en febreiro de 2013, un informe titulado “Xigantes das sementes vs. agricultores de EE.UU.”, do Centro de Seguridade Alimentaria, xa alertaba do aumento de prezos das sementres como resultado da concentración da industria de sementes. “Se esta adquisición ten lugar, Bayer podería controlar o 30% do mercado mundial de sementes e o 24% do mercado mundial de praguicidas, o que se pode chamar fortalecemento dunha posición dominante”, denuncian as eurodeputadas e eurodeputados.
A través desta operación, Bayer logrará unha concentración “sen precedentes” do mercado mundial nesta área sensible e “beneficiarase dunha influencia insoportable que poñerá en perigo tanto a forma de alimentarnos como o noso acceso aos tratamentos médicos asequibles”, considera Senra e demais denunciantes. “Dado que cada vez máis cidadáns europeos se están dando conta de que agora é urxente cambiar cara un modelo de agricultura sostible, esta adquisición irá en contra da súa vontade”, continúa a carta. “Moitos pacientes queixanse da opacidade e os prezos de algúns medicamentos comercializados polas grandes farmacéuticas como Bayer, e esta adquisición reforzará esta tendencia. Esta adquisición vai ir en contra dos principios que son importantes para nós: unha democracia vital na que o noso medio ambiente e a nosa saúde estean protexidos de xeito efectivo”, conclúen.
