· O PE chama a aplicar o principio de precaución con respecto ao emprego de pesticidas que ameazan a supervivencia dos insectos polinizadores
· A loita contra a Vespa Velutina e a aposta por etiquetaxes que rematen ca fraude no mel, aspectos tamén recollidos no informe aprobado hoxe
Bruxelas, 1 de Marzo de 2018. O Parlamento Europeo (PE) vén de aprobar en sesión plenaria un informe sobre perspectivas e desafíos para o sector apícola da Unión Europea. Lídia Senra, coordinadora do Grupo da Esquerda Unitaria Europea/Esquerda Verde Nórdica na Comisión de Agricultura e Desenvolvemento Rural do PE, valorou moi positivamente a aprobación deste texto, que recolle expresamente a preocupación derivada do significativo aumento da mortalidade das abellas melíferas e polinizadores silvestres en Europa, salientando as preocupantes repercusións que esta situación está a ter na agricultura, na biodiversidade e nos ecosistemas. “É importante que a nivel das institucións da UE se recoñeza os riscos que nestes momentos existen para a supervivencia das abellas e dos polinizadores en xeral, así como para as propias persoas que se adican á apicultura. É relevante que se trate dun posicionamento tan completo e que presente varias accións concretas a desenvolver”.
Así, a eurodeputada galega chamou a “activar urxentemente” as medidas recollidas no texto, que contemplan accións como definir un plan a nivel europeo para loitar contra la mortandade das abellas, a potenciación de superficies de interese ecolóxico, a aplicación do principio de precaución a fin de protexer a todos os polinizadores ou a suspensión do emprego de praguicidas que conteñan substancias activas que poñen en risco a saúde das abellas. “Facemos un chamamento á Comisión Europea e aos Estados membro para que asuman as propostas aprobadas hoxe e implementen as medidas necesarias para facelas efectivas”.
Senra, que ao longo de toda a lexislatura vén trasladando ao Parlamento Europeo as denuncias e preocupacións que o sector apícola está a subliñar con respecto á situación das abellas, nomeadamente con cuestións de especial graviadade como os riscos derivados da praga da Vespa Velutina ou o impacto do emprego de produtos neonicotinoides na supervivencia dos polinizadores, interviu hoxe na sesión plenaria para resaltar a importancia de “pór en práctica medidas para aumentar a protección xurídica e o apoio financieiro ás poboacións locais de abellas melíferas en toda a Unión, incluíndo a protección xurídica das zonas de conservación destas abellas, abarcando tamén todo o referido aos neonicotinoides”.
A eurodeputada galega tamén reiterou a importancia da loita contra a fraude na distribución do mel, “a través do desenvolvemento de procesos de análise eficaces, o reforzo dos controis públicos e unha etiquetaxe clara, na que se recolla a orixe exacta do produto”.
