Bruxelas, 03 de Abril de 2019. Lídia Senra e o fotógrafo galego Gabriel Tizón inauguraron esta tarde a mostra “A Europa d@s nen@s perdid@s” no Centro Galego de Bruxelas La Tentation. Integrada por un total de 40 imaxes tomadas nos últimos catro anos, reveladas en lona a gran formato, corresponden a viaxes realizadas por Tizón a fronteiras de ata 14 países europeos.
A través desta iniciativa a eurodeputada galega quere colaborar na visibilización dunha das consecuencias máis agochadas do desleixo ca que a UE está a “xestionar” a chegada de poboación que fuxe da violencia extrema nos seus países: a desaparición de nenas e nenos.
As alarmas saltaron no ano 2016, cando un informe da Europol alertou de que alomenos 10.000 nenas e nenos refuxiados desapareceran nada máis pisar Europa. Sen embargo, e malia que dende institucións a tódolos niveis, organizacións gubernamentais e ONG’s seguen a denunciar que esta situación persiste, as explicacións dilúense nun inconcreto abano e posibilidades que ninguén está asumindo a responsabilidade de aclarar.
Durante a apertura da mostra ao público, Lídia Senra destacou a importancia de “dar visibilidade á situación que padecen milleiros de nenos e nenas nas fronteiras europeas, realidade da que non se adoita falar ao abordar a situación das persoas que buscan refuxio en Europa. Unha vez máis temos que condenar a hipocrisía da Unión Europea, que ao mesmo tempo que di salvagardar os dereitos humanos é responsábel da traxedia que viven milleiros de persoas migrantes cada día, e non fai absolutamente nada para rematar ca situación de abandono dos nenos e nenas, especialmente daqueles que viaxan sós e soas. Trátase dunha gravísima vulneración máis elementais normas internacionais de protección de menores por parte dos Estados membro e as institucións europeas”.
“As nenas e nenos refuxiados desaparecen secuestrados por mafias e traficantes que traballan o longo de todo o camiño. Ás veces engánanos, outras simplemente usan a forza, e o destino final case sempre é o mesmo: a escravitude, a prostitución e o tráfico de órganos”, explicou o fotógrafo galego.
Esta mañá Tizón interveu tamén na reunión do Grupo da Esquerda Verde Nórdica-Esquerda Unitaria Europea (GUE/NGL), ao cal pertence a galega Lídia Senra, para trasladar ás eurodeputadas e eurodeputados claves ao respecto da desaparición masiva de cativas e cativos refuxiados en territorio europeo. “Logo de tantos anos traballando no terreo, verte intervindo nun espazo como o Parlamento Europeo impacta en certo modo, pero cos pes na terra, conscientes da responsabilidade que ten a UE nesta situación. Creo que é importante chegar até aquí con estas persoas, inda que sexa en imaxes. Non nos facemos falsas ilusións, pero agardamos que sirva para avanzar na sensibilización con respecto a esta situación que é unha vergoña para toda Europa”.
Na súa intervención o fotógrafo tamén incidiu no incomprensíbel e inhumano que resulta o feito de que “axudar a estas nenas e nenos é considerado un delito, cando en realidade poderiamos dicir que non coidar deles e delas é antinatural, é como non coidar da nosa especie. É complicado comprender que un pasaporte é máis importante que unha persoa”.
