- As políticas de desenvolvemento da UE non deben esixir contrapartidas comerciais, e urxe o reintegro da débeda colonial francesa con Haití
- O respecto ao dereito á Soberanía Alimentar do pobo haitiano e o apoio ao campesiñado, algunhas da propostas realizadas dende o GUE/NGL
Estrasburgo, 08 de Febreiro de 2018. Na mañá de hoxe o Parlamento Europeo (PE) aprobou unha proposta de resolución alertando da arrepiante situación de escravitude infantil en Haití vinculada ao traballo doméstico, situación na que se están vendo atrapad@s arredor de 400.000 menores, un 60% nenas.
Lídia Senra, responsábel para o Grupo Confederal da Esquerda Unitaria Europea/Esquerda Verde Nórdica (GUE/NGL) na Delegación paritaria Africa-Caribe-Pacífico (ACP-UE) interveu no debate previo matizando que Haití non é un país “pobre”, senón un país “empobrecido, afogado pola débeda imposta por Francia e distintas institucións internacionais; devastado polo terremoto de 2010 e máis tarde polo furacán Matthew. O 77% dos seus habitantes viven con menos de 2 dólares ao día e atópase nunha situación de inseguranza alimentar grave”.
A eurodeputada galega, que no pasado mes de decembro desprazouse a Haití no marco dunha delegación da ACP-UE que lle permitiu coñecer in situ a actual situación do país, explicou que debido á vulnerabilidade social vinculada á situación económica que afoga a poboación, “un grande número de familias vense obrigadas a confiar os seus fillos e as súas fillas a outras persoas para garantir a supervivencia destas nenas e nenos; situación que en moitos casos acaba derivando en que sexan obrigadas e obrigados a realizar traballos domésticos, así como vítimas da explotación e da violencia tamén sexual”. Un primeiro paso, propuxo, sería que as autoridades haitianas ratificasen a Convención 189 da OIT, “asegurando os controis necesarios para evitar a explotación infantil e a violencia, e prestando atención á violencia sexual no traballo doméstico”.
Senra reivindicou tamén hoxe no pleno do PE que para combater cuestións dunha gravidade tan alarmante como a escravitude infantil a Unión Europea ten que adoptar medidas que realmente favorezan o desenvolvemento do país. Neste sentido, demandou que a UE non condicione as cuantías económicas vinculadas á axuda ao desenvolvemento a que o Goberno haitiano ratifique acordos de asociación económica ca UE.
Entre a batería de medidas concretas propostas polo Grupo da Esquerda Unitaria Europea/Esquerda Verde Nórdica, a eurodeputada galega apuntou a pertinencia de que, tendo en conta a grave carga de débeda que constriñe a economía haitiana, “as axudas económicas non sexan concedidas en forma de préstamos, senón como doación”, advertindo entre as responsabilidade europeas que o Estado francés “debe reembolsar a débeda colonial”.
Por último, como responsábel para o GUE/NGL na Comisión de Agricultura e Desenvolvemento Rural, así como na Delegación ACP-UE, Lídia Senra esixiu “respeto polo dereito de Haití á Soberanía Alimentaria e apoio ao campesinado para producir a alimentación para o seu pobo”.
Imaxe: povertyresolutions
