- Os diferentes relatorios e mesas de debate do evento desenvolveranse entre as 10:00 e as 19:30 horas na Casa das Campás
- Abordaranse alternativas para facerlle fronte ao despoboamento do rural e para protexer e conservar o patrimonio termal e arqueolóxico
Pontevedra, 07 de xullo de 2017. Máis dunha docena de persoas chegadas de diferentes lugares e expertas na xestión sustentábel do territorio participarán este sábado, 8 de xullo, como relatoras na xornada “A xestión sustentábel do territorio: Debate para avanzar na Galiza e en Europa”. Organizado pola eurodeputada galega Lídia Senra, o evento aberto a todos os públicos sen necesidade de inscrición previa, estruturarase en varios bloques temáticos de análise, coloquio e interacción cos e coas asistentes, desde as 10:00 e até as 19:30 horas na Casa das Campás de Pontevedra.
“Necesitamos intercambiar opinión, experiencias, reflexionar e debater”, defende Lídia Senra, que asegura que “estamos nun momento no que as forzas neoliberais intentan a cada paso máis perverter o termo sustentábel e usalo para nomear accións e políticas súas impulsadas na Galiza e en toda Europa que en realidade de sustentábeis non teñen nada”. Por iso, “cómpre analizar o que está a acontecer coa xestión do territorio, coa falta de respecto e desleixo que amosa a Administración galega, estatal e europea cara ao rural, ao patrimonio arqueolóxico e cultural, aos bens termais, e propoñer alternativas e saídas de presente e futuro que sexan verdadeiramente sustentábeis”, di.
En colaboración coas asociacións Anova Terra, Irmandade Illa de Tambo, Colectivo pola Defensa do Patrimonio A Forneiriña, Umia Vivo e Plataforma pola Defensa do Patrimonio Termal,.a xornada incluirá catro charlas-coloquio (dúas en horario de mañá e dúas en horario de tarde).
A primeira delas será ás 10:30 horas, e correrá a cargo de Pedro Mota e Costa, chegado de Portugal, docente de Ensino Superior e asesor de Xestión Autárquica e Finanzas Locais. Levará acabo un relatorio que versará sobre a “Promoción da sustentabilidade local a través de discriminación financeira positiva” e falará do caso luso.
Ás 12:15 horas comezará a segunda mesa, na que Eduardo José Corbelle Rico, enxeñeiro de Montes e profesor universitario de Enxeñaría Agroforestal no Campus de Lugo; Belén Fervenza, responsable do sector de horta, froita e flor do Sindicato Labrego Galego (SLG); e María Ángeles Ríos Pintos, da Mancomunidade de Montes Veciñais en Man Común de Pontevedra, falarán sobre “O despoboamento do rural: Un problema europeo a afrontar. Alternativas para a xestión do solo para usos agrogandeiros e forestais”.
Xa pola tarde, ás 16:00 horas terá lugar un debate sobre “A xestión dos recursos hidrolóxicos. O aproveitamento enerxético dos caudais e os dereitos públicos e veciñais sobre as augas e o patrimonio termal”, a cargo de Heitor Picallo Fuentes, enxeñeiro e investigador, membro da Plataforma pola Recuperación do Patrimonio Termal de Cuntis e Caldas de Reis; e Telma Lago Rodríguez, da Cooperativa Nosa Enerxía.
E para rematar a xornada, ás 18:00 horas, comezará un coloquio sobre “Ameazas que afectan ao patrimonio cultural arqueolóxico. Propostas fronte ao esquecemento”, con Antonio Costa, presidente da Asociación Irmandade Illa de Tambo; e Xesús Rodríguez Castro, presidente da Asociación Umia Vivo.
