- Lídia Senra tomou a palabra no pleno da Eurocámara para denunciar os abusos empresariais amparados polas reformas laborais
- A eurodeputada de AGEe reclama que se leven a cabo canto antes medidas para rematar coa destrución de emprego
Estrasburgo, 25 outubro 2016. Lídia Senra, eurodeputada de Alternativa Galega de Esquerda en Europa (AGEe), integrada no Grupo Confederal da Esquerda Unitaria Europea/Esquerda Verde Nórdica (GUE/NGL), interveu no pleno do Parlamento Europeo que esta semana se está a desenvolver en Estrasburgo para pedir que a Comisión Europea e o propio Parlamento interveñan para poñer fin aos “abusos” que están a levar a cabo empresas como o Banco Pastor, o Banco Popular e Isolux Corsán, que pretenden levar a cabo procesos de regulación de emprego que implicarían deixar na rúa a 500 homes e mulleres na Galiza e a 3.400 en todo o Estado español.
Lídia Senra, que o venres pasado estivo falando coas persoas afectadas por estes ERE durante as protestas que mantiveron en Santiago, diante do edificio do Parlamento Galego, coincidindo co inicio da X Lexislatura autonómica, decidiu solicitar no pleno da Eurocámara o minuto de intervención libre para poñer de manifesto onte pola noite esta dramática situación laboral. “Reclamámoslle á CE e a este Parlamento que interveñan para poñer fin a estes abusos das empresas, amparadas polas reformas laborais, e para que poñan en práctica medidas para acabar con estas situacións totalmente inxustificadas que destrúen emprego, aumentan o risco de pobreza e exclusión social, hoxe situada nun 28,6%, e aumentan a precariedade laboral cando no Estado español xa un de cada cinco traballadores e traballadoras cobran menos de 300 euros”, dixo a eurodeputada galega.
Á vista desta situación e destes datos, desde AGEe tamén nos preguntamos onde vai a promesa de Juncker de que a mocidade de hoxe non será máis pobre que a xeración das súas nais e pais; tamén nos preguntamos o que está facendo a Comisión para conseguir o obxectivo de “ter un efecto decisivo na erradicación da pobreza”, como prometeu.
