A Facultade de Filosofía de Santiago de Compostela acolleu o pasado mes de novembro as xornadas “A esquerda europea, garante dos dereitos das persoas fronte ás políticas de austeridade”, organizadas polo GUE/NGL, Grupo do que AGEe forma parte.
Poñemos a disposición pública os diferentes vídeos gravados durante as Xornadas nas que a eurodeputada Lídia Senra, que actuou de anfitrioa, subliñou que as institucións europeas “están empeñadas en facernos crer que a única alternativa é a austeridade, manter na miseria as clases populares e o conxunto da cidadanía”. Por iso “é especialmente importante dende a esquerda europea debater sobre a situación dos pobos, sobre todo do Sur da UE”. “Temos que reflexionar e abrir un debate, non pode haber tabús para trazar a europa dos pobos e da solidariedade”, aseverou a eurodeputada galega.
Tamén o deputado de AGE no Parlamento Galego, Antón Sánchez, reiterou a importancia de reflexionar sobre cuestións como a austeridade ou a propia UE, “porque participamos en movementos sociais e políticos que buscan a emancipación das persoas, e para isto é necesario ter unha posición debatida sobre o principal instrumento de control da cidadanía e da democracia: o euro”.
Aquí podedes acceder ao vídeo resumo das xornadas:
As xornadas comezaron cunha mesa titulada “As políticas de austeridade e a ditadura do euro”, na que interviron o catalán Joan Tafalla, Doutor en Historia pola U.A.B. e membro da Asociación Expai Marx; Daithí Doolan, Concelleiro do Sinn Féin en Dublín (Irlanda); e Ramón Franquesa, Profesor de Economía na Universidade de Barcelona.
Joan Tafalla, encetou a xornada expoñendo unha fonda análise da afección da crise económica en Grecia e a xestión aplicada dende a Unión Europea en clave neoliberal. Para este especialista económico, a aplicación de novos modelos económicos fieis aos dereitos humanos e sociais é unha tarefa que implica “pasar ao primeiro plano a recuperación da soberanía nacional fronte á liquidación da mesma por parte da UE”.
Vídeo da intervención de Joan Tafalla:
Daithí Doolan sinalou na súa intervención que o seu país atópase “nunha situación especial” caracterizada pola duplicidade. “Estamos loitando contra a austeridade a ámbolos lados da fronteira. Temos dúas moedas, a libra esterlina no norte e o euro no sur, dous sistemas de saúde, dous de benestar social e dúas estruturas gubernamentais locais separadas, o cal é unha custosa herdanza do colonialismo británico”. Neste senso, sinalou, “o debate en curso sobre unha saída británica da UE ten o potencial de ter un grave impacto nas relacións anglo-irlandesas, e tamén terá un impacto directo na nosa loita pola reunificación de Irlanda”.
Vídeo da intervención de Daithí Doolan:
Pola súa banda, Ramón Franquesa centrou a súa exposición no euro, moeda que cualificou de “mecanismo de destrución social”, e animou a “seguir a pista dos cartos para entender o que está a suceder”, un camiño que lévanos a confirmar que “quenes provocaron a crise son os que se están a beneficiar máis dela grazas ao terríbel sistema monetario europeo”.
Vídeo da intervención de Ramón Franquesa:
Xa pola tarde, nas Xornadas tivo lugar a mesa titulada “Propostas dende a esquerda para poñer os dereitos das persoas no centro das políticas da Unión Europea”, na que interviron Yolanda Jubeto, Yolanda Jubeto, Doutora en Economía pola Universidade do País Vasco e activista feminista; Fabio De Masi, Deputado no Parlamento Europeo polo Die Linke (Alemania); e Xosé Manuel Beiras. Portavoz Nacional de Anova-IN e Portavoz de Alternativa Galega de Esquerda (AGE) no Parlamento Galego.
Yolanda Jubeto plantexou un cambio radical do actual paradigma económico, avogando por “situar no centro do sistema económico a Vida e poñendo ao seu servizo a produción, e non ao contrario, como acontece actualmente”. Cómpre visibilizar o “conflicto existente entre Capital e Vida”, pero dende unha visión ampla, que conxugue a “economía feminista, ecoloxista e solidaria”, reivindicando unha visión integral dos espazos do benestar e do malestar”.
Vídeo da intervención de Yolanda Jubeto:
Pola súa banda, Fabio De Masi situou a cuestión da moeda única europea como “un tema que afecta ao núcleo da democracia”, xa que repercute na vivenda, na atención sanitaria, en resumo, “aos problemas da xente día a día”, e subliñou que “é tarefa da esquerda dar respostas”. O economista alemán defendeu que a imposibilidade de evitar o debate sobre o Euro, xa que o Euro “non é simplemente unha moeda, é un conxunto de normas que reflicten unha serie de cuestión en Europa”. A día de hoxe, afirmou De Masi, “a austeridade matou a produción económica e a capacidade de xerar ingresos”.
Vídeo da intervención de Fabio de Masi:
E Xosé Manuel Beiras pechou as Xornadas realizando unha recapitulación histórica do que é “a contraposición do edificio da Unión Europea construído no Tratado de Maastricht e o que é o proxecto da Unión Europa social”, que, defendeu, “actualmente está en xogo”. Beiras fixo un chamamento a estender o debate para poder chegar a unha “indispensable estratexia europea das forzas cívicas e políticas da esquerda” para recuperar a Europa social fronte ao “auténtico 4º Reich no que se converteu actualmente a UE”, denunciou.
Vídeo da intervención de Xosé Manuel Beiras
