Lídia Senra tomou a palabra este luns pola noite no pleno do Parlamento Europeo, en Estrasburgo, para intervir no debate sobre a Unión Europea da Defensa.
A eurodeputada galega defendeu que “non é pola vía da militarización e o aumento das medidas represivas como haberá máis seguridade na Europa“. “Deixen de mentir”, reclamou.
“Co aumento do despregamento militar, preténdese reforzar un aparato represivo e militar para defender os intereses das grandes corporacións transnacionais, das empresas de seguridade e de armamento e as políticas neoliberais para concentrar aínda máis a riqueza nos xa mais ricos e seguir despoxando ás clases populares dos seus dereitos e do dereito a unha vida digna e tamén aos pobos dos seus recursos naturais, dos bens comúns e do seu dereito ao desenvolvemento.
Contra o despregamento militar e as políticas represivas, contra a Unión Europea da Defensa, queremos máis educación pública, máis saúde pública para todas e para todos e en todo o mundo. Queremos que lle devolvan aos pobos o dereito a decidir, a traballar, a desenvolverse con base nos seus recursos e en harmonia coa conservación do medio“, dixo.
“Os nosos inimigos non chegan ao Mediterráneo, os nosos inimigos chegan na forma de políticas neoliberais que atentan contra a dignidade humana e a vida no planeta“, concluía a intervención escrita completa.
