- O acto público terá lugar en Exposalnés, coa europarlamentaria Lídia Senra e o concelleiro e terceiro tenente de alcalde Constantino Cordal
- A eurodeputada informará de como poden afectar as modificacións europeas sobre medidas técnicas e o Regulamento de Control da Pesca
Santiago, 21 de setembro de 2018. Cambados acollerá este sábado, 22 de setembro, ás 12:00 horas, en Exposalnés, un coloquio sobre ‘O futuro do xeito e da pesca artesanal galega na Unión Europea’, no que intervirán a eurodeputada galega, membro do Grupo Confederal da Esquerda Unitaria Europea/Esquerda Verde Nórdica (GUE/NGL), Lídia Senra; e o concelleiro e terceiro tenente de alcalde de Cambados, Constantino Cordal.
A eurodeputada Lídia Senra anima a todas as persoas interesadas na situación do sector pesqueiro galego a acudir á cita. Nela, informará das negociacións que se están levando a cabo nas institucións europeas e que poden poñer en perigo a arte pesqueira do xeito, que a Comisión Europea xa intentou prohibir no ano 2014 e que agora, cando se está tratando o novo Regulamento sobre a Conservación dos recursos pesqueiros e a protección dos ecosistemas mariños con medidas técnicas, non está garantido que se vaia manter a dimensión da malla actual. “A día de hoxe, a proposta da Comisión sigue sendo que a dimensión da malla para pescar especies peláxidas pequenas con redes de deriva como é o xeito sexa 50 milímetros e a nosa emenda para modificar isto non foi aprobada, igual que tampouco o foron outras presentadas por outros eurodeputados no mesmo sentido”, asegura. Senra leva tempo loitando para que se inclúa a especificación do uso de mallas de menos de 40 mm para a pesca da sardiña e chama a todo o sector a informarse e a mobilizarse na Galiza para facer forza e poder blindar esta exixencia, pois, do contrario, o sector podería verse moi afectado.
No coloquio tamén se abordará a modificación do Regulamento de Control da Pesca na UE que agora mesmo está a debate no Parlamento Europeo e que pretende aumentar a fiscalización ao sector e as medidas burocráticas e de control, algo que preocupa e moito, pois podería repercutir no futuro da flota galega en gran medida. Durante o acto tamén se tratará sobre outras Resolucións aprobadas polo Parlamento Europeo como a que inclúe que en augas interiores, a pesca accidental artesanal quede fora de cotas. Así, abordaranse posibles medidas a tomar para que a Comisión e o Consello leven a cabo esta recomendación tan necesaria.
Co acto deste sábado en Cambados, a eurodeputada continúa a serie de coloquios públicos sobre o sector pesqueiro que xa comezou a semana pasada, cando estivo falando sobre o mesmo asunto en Cangas. Despois de estar mañá en Cambados, Lídia Senra tamén ten previsto estar o venres 5 de outubro, ás 20:00 horas, no Cuartel Vello de Rianxo, para abordar as mesmas cuestións.
