- Lídia Senra asina, con outras eurodeputadas/os, unha carta dirixida ao Director Xeral de Españois no Exterior preocupándose por Dogan Güzel
- O ilustrador gráfico e colaborador do diario dirixido á poboación kurda Özgür Gündem foi arrestado e denunciou ter sufrido agresións
Santiago, 19 agosto 2016. Lídia Senra, eurodeputada de Alternativa Galega de Esquerda en Europa (AGEe), integrada no Grupo Confederal da Esquerda Unitaria Europea/Esquerda Verde Nórdica (GUE/NGL), ven de asinar, xunto a outras eurodeputadas e eurodeputados do Estado español, unha carta dirixida ao Director Xeral de Españois no Exterior e de Asuntos Consulares e Migratorios, Cristóbal Ramón Valdés y Valentín-Gamazo, amosando a súa preocupación pola situación de Dogan Güzel, cidadán español, ilustrador gráfico e colaborador do diario Özgür Gündem, que foi detido polas forzas policiais turcas.
Tal e como recolle a carta textualmente, “o arresto produciuse no marco da purga de medios de comunicación que está levando a cabo o presidente da República de Turquía, Recep Tayyip Erdogan, como parte do seu plan antigolpista. Özgür Gündem é un medio de comunicación dirixido á poboación kurda que vive en Turquía. Unha vintena de colaboradores deste medio tamén foron encarcerados, entre eles xornalistas, fotógrafos e cámaras. Güzel tamén colaborou en medios de comunicación españois como 20 Minutos e Intermedia Producciones e foi galardoado co Premio ao Valor pola asociación estadounidense Cartoonist Rights, entre outros”.
A misiva fai referencia a que “Turquía atópase entre os países que máis violacións contra a liberdade de expresión cometen. Segundo a asociación Reporteiros sen Fronteiras, Turquía está no posto 151 de 180 na clasificación da liberdade de prensa precisamente porque viola de xeito sistemático un dos piares fundacionais da Unión Europea, a expresión libre de ideas, opinións e noticias. A raíz do fallido golpe de Estado e das políticas represivas postas en marcha polo executivo turco, os dereitos humanos e a liberdade de expresión sufriron máis retrocesos, como denuncia Amnistía Internacional, destacando entre outras cousas que –a 25 de xullo- se dictaran 42 ordes de detención contra xornalistas e había 6 xornalistas detidos. Tamén se bloquearon 20 sitios web de noticias, revocáronse as licenzas de 25 medios de comunicación e o período de detención sen comunicación pasou de 4 a 30 días”.
A pesar de que onte foron liberados tanto Dogan Güzel como os seus compañeiros baixo a imputación de resistencia á autoridade, as e os eurodeputados asinantes da carta aseguran que continúan a “temer pola súa integridade, xa que todos os detidos denunciaron agresións durante a detención”. É por iso que as e os deputados no Parlamento Europeo toman a iniciativa e pregúntanlle a través da citada carta ás autoridades do Estado español polas “xestións diplomáticas que pretenden realizar para que Dogan Güzel e demais cidadáns como el, que non cometeron delito algún máis que denunciar as violacións de dereitos humanos que se cometen contra o pobo kurdo, non volvan padecer detencións arbitrarias”.
