- Lídia Senra participa na rolda de prensa do Basque Frienship Group polos 10 anos da resolución da Eurocámara en apoio á fin do conflito
- A membro de AGEe pediu xunto a outros 4 eurodeputados/as que esta resolución se inclúa na axenda de negociación do novo Goberno estatal
Bruxelas, 19 outubro 2016. Lídia Senra, eurodeputada de Alternativa Galega de Esquerda en Europa (AGEe), integrada no Grupo Confederal da Esquerda Unitaria Europea/Esquerda Verde Nórdica (GUE/NGL), participou este mércores na rolda de prensa organizada en Bruxelas polo Grupo de Amizade do País Vasco no Parlamento Europeo. En calidade de membros do Basque Frienship Group, Lídia Senra, así como a eurodeputada do Sinn Féin Martina Anderson, o eurodeputado de Nova Alianza Flamenca Mark Demesmaeker, o eurodeputado catalán de Esquerra Republicana de Catalunya Josep-maria Terricabras, e a eurodeputada do Grupo dos Verdes/Alianza Libre Europea Tatiana Zdanoka, tomaron a palabra para realizar un chamamento aos partidos políticos do Estado español co obxectivo de que se inclúa na axenda do novo Goberno estatal a resolución aprobada hai agora dez anos por parte do Parlamento Europeo en apoio ao proceso de paz do País Vasco.
Lídia Senra lembrou na súa intervención como o Parlamento Europeo aprobou o 23 de outubro do 2006 a citada resolución “de apoio ao proceso de paz vasco”, grazas “á ardua labor dos grupos políticos, parlamentarias e parlamentarios e outros actores que estiveron involucrados no esforzo de perseguir un escenario de paz duradeira”. Neste sentido, a eurodeputada galega considerou que o “primeiro punto da folla de ruta cumpriuse co anuncio de ETA de poñer fin á súa actividade armada, aínda que o segundo punto, referido á apertura das negociacións sobre as consecuencias do conflito, foi desbotado polos gobernos do Estado español e francés”. “Está claro que o proceso de resolución do conflito vasco progresou de xeito moi positivo nos últimos anos. Avanzouse moito, pero aínda queda moito por facer”, dixo.
Así, cando se fan dez anos daquela resolución, o Basque Frienship Group dá agora un novo paso e realiza desde o Parlamento Europeo un chamamento para que o Estado español inclúa esta cuestión nas negociacións para a formación dun novo goberno, sexa cal sexa a súa cor política, e non perda a oportunidade de alcanzar unha paz duradeira no País Vasco. As eurodeputadas e eurodeputados recalcaron no texto que leron que a resolución segue en vigor e que aposta por un proceso que aborde todos os elementos cruciais do conflito, como o desarme e a situación de presas e presos e vítimas.
