- Senra rexeitou unha proposta de acordo que favorece que empresas europeas expolien recursos naturais e enerxéticos de Europa do Este
- AGEe lembrou as consecuencias na Galiza logo de trinta anos pertencendo á UE e da imposición das medidas de austeridade
Estrasburgo, 21 Xaneiro 2016. A eurodeputada de Alternativa Galega de Esquerda en Europa (AGEe), Lídia Senra, amosou o seu “rexeitamento” á proposta presentada no Parlamento Europeo en relación ao establecemento de Acordos de Asociación/Zonas de libre comercio de alcance “amplo e fondo” da Unión Europea con Xeorxia, Moldavia e Ucraína, votada esta mañá.
Durante o debate que tivo lugar no serán de onte, Senra chamou a atención sobre o feito de que estes acordos “permitirán ás multinacionais europeas apropiarse das ricas terras de Ucraína, dos seus minerais ou das súas augas”.
Aproveitamento estratéxico que tamén se identifica no caso de Xeorxia, onde as empresas europeas terán acceso á explotación “das súas madeiras, da súa enerxía hidráulica e beneficiaranse da súa situación como corredor do transporte Europa-Cáucaso-Asia”, aliás de seren países cobizados como novos mercados de consumidoras e consumidores.
Diante deste escenario, a eurodeputada galega subliñou onte na Eurocámara que cómpre que os pobos ucraíno, xeorxiano e moldavo coñezan cal é a situación dos pobos do sur de Europa “logo de que as multinacionais europeas se apropiaran dos nosos recursos e dos nosos mercados, e tamén logo da aplicación das políticas de austeridade”.
Así, Senra reiterou no pleno do Parlamento Europeo en Estrasburgo, que na Galiza “logo de trinta anos de Unión Europea volvemos ter fame; máis do 50% da mocidade está desempregada, máis do 22% da poboación está en risco de pobreza e exclusión social, milleiros de agricultoras/es desapareceron e centos de empresas pecharon”. “Este é o modelo de Unión Europea que lles ofrecemos”, advertiu.
