- Expertos en seguridade social, traballo e xubilación analizarán a situación da Galiza, Estado español, Irlanda, Portugal, Grecia, Francia, Finlandia e Suecia
- O encontro, aberto ao público, prolongarase deste o venres pola mañá até o sábado a mediodía, organizado pola eurodeputada Lídia Senra e MODEPEN
Santiago, 27 de setembro de 2018. Santiago converterase, a partir de mañá venres e até o sábado a mediodía, na capital europea do debate sobre o futuro das pensións. O Palacio de Congresos da cidade compostelá acollerá a relatoras e relatores chegados non só da Galiza e do resto do Estado español, senón tamén de Irlanda, Portugal, Grecia, Francia, Finlandia e Suecia, expertos e expertas todas elas en seguridade social, traballo, e xubilación, para analizar a situación que se está a vivir con respecto ás pensións nos países rescatados de Europa e nos países que non o foron e teñen outro tipo de realidades e alternativas postas enriba da mesa. Organizadas pola eurodeputada Lídia Senra, en colaboración co Movemento Galego pola Defensa das Pensións (MODEPEN), as xornadas pretenden ser un punto de encontro e debate, para intercambiar experiencias sobre o que está a pasar coas pensións nos diferentes países, e artellar posibles vías de traballo común futuro para reivindicar a necesidade de manter os sistemas de pensións públicos e unhas pensións dignas. Trátase de facerlle fronte aos intentos de camiñar cada vez máis cara á privatización das pensións, que pretende o capitalismo e o neoliberalismo, e que a Unión Europea intenta reforzar co regulamento para a creación dun Produto Paneuropeo de Pensión Individuais.
Baixo o título de “O futuro das pensións. Galiza, Estado español e Europa”, as xornadas, que están abertas a todas aquelas persoas que queiran asistir, sen necesidades de inscrición previa e de xeito gratuíto, estruturaranse en diferentes coloquios e debates. O venres a sesión comezará ás 9:30 horas, cando Lídia Senra se encargará de abrir o evento e dar a benvida a todas as participantes, para a continuación dar paso á primeira mesa que estará centrada nas experiencias dos países rescatados de Europa, na que participarán Dimítris Stratoúlis, ex vice-ministro da Seguridade Social e membro do Secretariado Político de Unidade Popular de Grecia; María Isabel Lemos, membro da Direcção Nacional da Inter-Reformados/Confederação Geral dos Trabalhadores Portuguesses-Intersindical Nacional (CGTP-IN); e John Brady, deputado no Parlamento de Irlanda polo Sinn Féin.
Xa ás 12:00 horas, terá lugar a segunda mesa da xornada, con Victoria Portas, portavoz da Coordinadora Estatal pola Defensa do Sistema Público de Pensións e integrante de MODEPEN; Xabier Pérez Davila, economista, escritor e membro de MODEPEN; e o doutor en Dereito, inspector de Traballo e Seguridade Social e profesor na Universidade de Valencia Héctor Illueca, xunto con Ramón Franquesa, profesor de Economía na Universidade de Barcelona.
Xa o venres pola tarde, ás 16:00 horas, haberá un coloquio para abordar experiencias noutros países europeos, con Christophe Janot, secretario federal da Federación Nacional de Industrias Químicas de Francia (FNIC); Birgitta Sevejford, antiga alcaldesa do Consello do Condado de Estocolmo; e Henri Purje, asesor de política económica do grupo da Alianza de Esquerda no Parlamento de Finlandia.
Ao día seguinte, o sábado, haberá ás 9:30 horas un relatorio de Carolina Gala Durán, profesora de Dereito do Traballo e da Seguridad Social da Universidade Autónoma de Barcelona sobre “Muller, pensións e atención ás persoas dependentes”, que será introducida por Miguel Arenas, avogado laboralista, profesor colaborador na Universitat Oberta de Catalunya. E a continuación, a partir das 10:45 horas, terá lugar unha charla sobre “Reparto ou capitalación”, con Miren Etxezarreta, economista, profesora da Universidade Autónoma de Barcelona.
A partir das 12:30 horas, presentaranse as conclusións da xornada e alternativas sobre os seguintes temas: Muller, pensións e dependencia; Reparto e capitalización; As Pensións na Galiza; As reformas de 2011 e 2013; e o Produto Paneuropeo de Pensións Individuais (PEPP).
E novamente a eurodeputada Lídia Senra será a encargada de clausurar o evento, a partir das 13:00 horas, nunhas xornadas nas que tamén participarán a deputada de En Marea no Parlamento Galego Paula Vázquez Verao e a concelleira de Políticas Sociais de Santiago, Concha Fernández.
*Dada a importancia do tema que se vai tratar nestas xornadas e dada a presenza estes días en Santiago de Compostela de expertos e expertas que son referencia no ámbito das pensións no contexto galego, estatal e internacional, convócase a todos os medios de comunicación para tomar declaracións ás persoas participantes no hall de entrada do Palacio de Congresos o venres 28 de setembro, ás 11:30 horas; e o sábado 29 de setembro, ás 12:00 horas, durante a pausa café das sesións.
*Tamén estamos á vosa disposición para concertar entrevistas telefónicas, ou en persoa, durante o xoves, venres e sábado, a calquera dos e das ponentes, á eurodeputada Lídia Senra, ou a portavoces de MODEPEN e da Coordinadora Estatal pola Defensa do Sistema Público de Pensións.
__________
Máis información ou entrevistas:
Lídia Senra, eurodeputada galega, integrada no Grupo Confederal da Esquerda Unitaria Europea/Esquerda Verde Nórdica (GUE/NGL)
Tlf: 609 845 861, lidia.senra@europarl.europa.eu
http://lidiasenra.gal https://www.facebook.com/LidiaSenraRodriguez
(Prensa das xornadas: Rosabel —) 698144067
