- En 2015 e 2018 o TXUE anulou os acordos de libre comercio e de pesca UE – Marrocos por comercializar con recursos que son do pobo saharauí
- Senra é a responsábel para todo o GUE/NGL no seguimento de tres novos informes sobre as relacións comerciais entre a UE e Marrocos
Bruxelas, 12 de Novembro de 2018. Como xa alertou o mes pasado a eurodeputada galega Lídia Senra, logo de que o Tribunal de Xustiza da UE (TXUE) anulara no ano 2015 o libre comercio asinado entre a Unión Europea e Marrocos, e de que no 2018 anulara tamén o acordo pesqueiro, nun absoluto alarde de cinismo a UE está a pór en marcha estratexias co obxectivo de eludir cumprir o ditaminado polo seu propio tribunal en relación ao obrigado respecto da vontade do pobo saharauí sobre os seus recursos e territorios.
Para poder presentar novos acordos económicos que faciliten aproveitarse dos recursos naturais do pobo saharauí sen renunciar a ter como socio a unha potencia ocupante, como é o Reino de Marrocos, a UE está a desenvolver un procedemento coñecido como “intercambio de notas”. En palabras da propia Organización das Nacións Unidas (ONU), adóitase recorrer á técnica do intercambio de notas por tratarse dun procedemento rápido, ou, ás veces, para evitar o proceso de aprobación lexislativa[1]. A UE non dá puntada sen fío. Marrocos tampouco.
“Esta modificación que a UE está a tentar facer a través do procedemento de intercambio de notas non pode considerarse so de natureza técnica. Lévase a cabo nun contexto político, xudicial e xeopolítico amplo, no que a explotación dos recursos naturais son un elemento clave do conflito entre o Goberno de Marrocos e o pobo saharauí”, analiza Senra.
A deputada ven de presentar varias emendas á resolución non lexislativa da Comisión de Comercio Internacional (INTA) do Parlamento Europeo sobre a proposta de Decisión do Consello relativa á celebración do Acordo en forma de Intercambio de Notas entre a Unión Europea e o Reino de Marrocos sobre a modificación dos Protocolos n.° 1 e n.° 4 do Acordo Euromediterráneo polo que se crea unha Asociación entre as Comunidades Europeas e os seus Estados membros, por unha parte, e o Reino de Marrocos, por outra (0481/2018 – C8-0000/2018– 2018/0256M(NLE))[2]. A votación das mesmas na Comisión INTA está prevista para o vindeiro mes de decembro.
Lídia Senra fai fincapé cas súas achegas, entre outros aspectos, na advertencia de que os intereses políticos, económicos e comerciais nunca poden estar por riba do respecto e a garantía dos dereitos humanos e o dereito internacional, polo que as violacións de dereitos humanos que ocorren tanto no Sáhara Occidental Ocupado como en Marrocos, contraveñen a cláusula de dereitos humanos, que se considera en termos legais como un elemento esencial dos acordos comerciais ratificados por la Unión Europea.
Lembra tamén que a sentenza do TSXUE establece que o pobo saharauí debe ser consultado sobre calquera tipo de acordo aplicado aos seus recursos naturais mais, até o momento, “o pobo Sáhara Occidental non deu consentimento algún para este acordo, que debe ser expresado ademais a través da súa representante lexítima, a Fronte Polisario, en aplicación de la Resolución 34/37 da Asemblea Xeral das Nacións Unidas”.
Poñendo sobre a mesa unha vez máis o fondo significado político que transcende á anulación dos acordos comerciais UE-Marrocos e á resposta que se está a elaborar por parte da UE e Marrocos, a galega asina tamén unha emenda na que critica que o Consello teña posto como condición para a validez dun novo acordo o feito de que beneficie á poboación local, xa que baixo esta pretendida boa intención agóchase unha posición que busca favorecer á monarquía alauí. “A meirande parte da poboación que vive a día de hoxe no territorio son colonos marroquís, a poboación saharauí está minoría. Dende a invasión militar marroquí de 1975 o Reino de Marrocos desprazou centos de milleiros de colonos marroquís ao territorio do Sáhara Occidental co obxectivo deliberado de cambiar a composición demográfica da poboación no territorio. De feito, cabe lembrar que as leis internacionais consideran un crime esta estratexia”.
A este informe que está a elaborar a Comisión de Comercio Internacional do Parlamento Europeo serán achegadas tamén os informes de opinión da Comisión de Agricultura e Desenvolvemento Rural (AGRI) e da Comisión de Pesca (PECH).
Lídia Senra, coordenadora do GUE/NGL en AGRI e membro suplente de PECH é a deputada responsable por parte do GUE/NGL do seguimento de ámbolos dous informes de opinión, así como dun informe específico no que a Comisión de Agricultura é a competente para o fondo.
A opinión emitida pola Comisión de Agricultura en relación ao informe da Comisión de Comercio Internacional, e á que a deputada galega presentou 11 emendas, será votada hoxe luns 12 a última hora da tarde, nunha sesión extraordinaria convocada durante o pleno do Parlamento Europeo que está a ter lugar durante esta semana en Estrasburgo.
[1] Definicións de términos fundamentais na Colección de Tratados das Nacións Unidas: Definicións de termos fundamentais na Colección de Tratados das Nacións Unidas: http://www.un.org/es/treaty/untc.shtml#exchange
[2] Texto dispoñíbel neste enlace: http://www.europarl.europa.eu/sides/getDoc.do?type=COMPARL&reference=PE-627.726&format=PDF&language=pt&secondRef=02
