- Lídia Senra condena a “irresponsabilidade, a imparcialidade e a dobre vara de medir” da Subdelegación do Goberno de Pontevedra
Santiago, 25 de maio de 2017. A eurodeputada galega Lídia Senra, integrada Grupo Confederal da Esquerda Unitaria Europea/Esquerda Verde Nórdica (GUE/NGL), amosa a súa solidariedade con Mar de Lumes-Comité de Solidariedade Internacionalista e Agabo-Asociación Galego-Bolivariana Hugo Chávez, que se viron obrigadas a suspender a charla coloquio sobre a situación actual de Venezuela que organizaran para este xoves pola tarde no Museo Manuel Torres de Marín (Pontevedra), na que ía participar a Cónsul Xeral do Goberno Bolivariano en Vigo, Mónica Sánchez Morles, e o escritor e ministro do Goberno de Hugo Chávez, Farruco Sexto Novás.
As organizacións convocantes decidiron suspender o acto “ante a imposibilidade de garantir a integridade física e moral do público e das persoas convidadas”, despois de ter recibido ameazas por parte de grupos de residentes venezolanos na Galiza e despois de que a Subdelegación do Goberno de Pontevedra autorizara unha concentración pública destes grupos no mesmo lugar e á mesma hora que a charla que estaba previamente convocada.
Lídia Senra condena “a irresponsabilidade, a imparcialidade e a dobre vara de medir da Subdelegación do Goberno de Pontevedra”, lembrando que a fin de semana pasada a mesma Subdelegación prohibiu unha concentración veciñal pacífica que estaba previsto que tivera lugar na Estrada, coincidindo coa Festa do Salmón, para denunciar a contaminación do río Ulla por culpa do mal funcionamento da EDAR. “Prohiben a concentración veciñal pacífica na Estrada, que non ía interferir para nada no desenvolvemento dos actos oficiais, nin ía ocasionar ningún dano nin a persoas nin a bens e, sen embargo, uns días despois autorizan, como é o caso do que está a suceder en Marín, unha concentración sobre Venezuela ás portas dun acto convocado con anterioridade sabendo que aquí efectivamente pode haber interferencias e serios problemas. Aínda así, esta permítena”, valora a eurodeputada. “Entendemos que esta autorización é unha toma de posición clara para obstaculizar a convocatoria da charla e impedir que o público interesado poida coñecer e debater sobre o que está sucedendo realmente en Venezuela”, condena a europarlamentaria.
