A chamada débeda pública ten que deixar de ser un tema tabú. Así o demanda unha campaña posta en marcha pola Plataforma Auditoría Cidadá da Débeda, que ven de lanzar un manifesto en todo o Estado español no que se defende que o novo Goberno resultante das eleccións do 26 de xuño deberá auditar a débeda pública con activa participación da sociedade. Lídia Senra, eurodeputada de Alternativa Galega de Esquerda en Europa (AGEe), integrada no Grupo Confederal da Esquerda Unitaria Europea/Esquerda Verde Nórdica (GUE/NGL), é unha das cen primeiras persoas que xa asinaron dito manifesto.
Senra leva tempo denunciando que a débeda está a condicionar a vida de todas e de todos e que non pode ser que cada nena e neno que nace no Estado teña xa ao lombo máis de 23.000 euros de débeda, unha situación que vai afectar, e moito, á supervivencia dos servizos públicos básicos. Por iso, a eurodeputada defende que calquera posible goberno de esquerdas que poida sair tras o 26J vaino ter moi complicado se non se planta ante a débeda e non ten valentía para determinar que a débeda que é ilexítima, porque foi contraída contra os intereses da maioría social, non se paga.
“Ou poñemos as políticas que prioricen a vida das mulleres e homes por riba do pago da débeda ou imos mal”, dixo Lídia Senra este sábado pasado nun acto electoral organizado en Cangas por En Marea sobre “Como a UE inflúe nas nosas vidas”.
“Ao novo goberno non lle debe tremer o pulso para dicir que non se vai pagar unha débeda que foi contraida contra a sociedade e que é ilexítima. Non se pode ter medo, hai que dicilo así de claro e ser valente e facerlle fronte á UE. Vale máis vivir de pé que de xeonllos toda a vida. Deamos a batalla!“, defendeu Lídia en Cangas, xunto á cabeza de lista de En Marea por Pontevedra, Alexandra Fernández; o politólogo e candidato de En Marea ao Senado, Juan Villarino; e o número 3 da lista en En Marea por Pontevedra, Josué Villar.
O acto do sábado non foi o primeiro no que Lídia Senra abordou directamente en público o tema da débeda. De feito, AGEe en colaboración co GUE/NGL, a iniciativa da propia Senra, organizaron o pasado mes de maio en Santiago de Compostela unha xornada sobre a Débeda Pública e o impacto do memorando da UE, cuxo vídeo resumo deixamos aquí:
