- Lídia Senra está transmitindo á DX de Medioambiente da CE as posíbeis incompatibilidades da Lei de Depredación ca Directiva 2014/52/UE
- A CE especificou que a Xunta ten que lexislar cumprindo ca normativa comunitaria que mellora os principios de avaliación medioambiental
Estrasburgo, 07 de Febreiro de 2018. Lídia Senra, eurodeputada galega integrada no Grupo Confederal da Esquerda Unitaria Europea/Esquerda Verde Nórdica (GUE/NGL), trasladou hoxe á Dirección Xeral de Medioambiente a súa preocupación pola declaración de 18 parques eólicos como “proxectos de interese especial”, publicada onte no DOG.
Esta calificación, realizada grazas á coartada proporcionada pola Lei de Fomento da Implantación de Iniciativas Empresariais (Páx. 49578) -máis coñecida como Lei de Depredación da Galiza – é unha argucia que permite favorecer aos xigantes privados do monopolio enerxético -como neste caso, por exemplo, a Gas Natural Fenosa ou Enerfin Grupo Elecnor-, para que a Xunta de Galicia lles dea un trato de preferencia.
Isto concrétase, entre outros privilexios, na redución á metade dos prazos necesarios para a instrución do procedemento da autorización administrativa previa e/ou de construción, sendo especialmente significativa a redución á metade dos prazos de instrución do procedemento de avaliación ambiental, xa que presumibelmente conculca directamente o dereito a consulta e información da cidadanía afectada.
“Resulta intolerábel que a estas alturas do século XXI unha Administración pública como a Xunta de Galicia se gabe de aprobar leis para reducir á metade os prazos de avaliación ambiental argumentando que iso atrae inversores”, condenou a eurodeputada galega. “Está claro entón que o que Feijoo quere son inversores aos que lles interesa actuar en países nos que haxa unha deficiente protección dos dereitos sociais e do medioambiente; é dicir, actuar baixo lexislacións que lles permitan expoliar fácil e rápido os seus recursos naturais, como coa Lei de Depredación do Partido Popular. Logo, cando rematen de aproveitarse, quedaremos a poboación vivindo en comunidades meidoambiental e socialmente desfeitas”.
Dende que a finais de decembro o Comisario de Medioambiente, Karmenu Vella, respostou a unha pregunta parlamentaria de Senra sobre posíbeis incompatibilidades entre a Lei de Depredación e a Directiva 2014/52/UE alertando do feito de que a propia Comisión Europea ten un procedemento de infracción en curso contra o Estado Español por non ter transposto a directiva no prazo especificado -16 de maio do 2017-, a eurodeputada está a manter contactos ca Comisión Europea a fin de trasladar directamente aqueles aspectos susceptíbeis de incumprir a normativa europea de protección medioambiental que o Partido Popular, tanto no Goberno central como no galego, estase negando a acatar.
Neste caso, Lídia Senra alertou á Dirección Xeral de Medioambiente da CE da aplicación da figura “proxecto de interese especial” como “unha estratexia para saltarse o dereito que teñen as persoas afectadas por estes proxectos a pronunciarse sobre os mesmos, así como á garantía de procesos de avaliación ambientais exhaustivos”.
A citada Directiva europea ten entre os seus obxectivos fundamentais a mellora dos principios de avaliación ambiental de proxectos públicos e privados, co cal a priori semella non ter moita cabida a creación dunha fórmula como a de “proxecto de interese especial”, que vén a ser unha coladeira para o negocio das eólicas. “Resulta indignante ver como se esforzan para inventar unha figura como a de “proxecto de interese especial” con tal de favorecer os intereses das empresas enerxéticas, mentras que por outra banda tentan destruír servizos que son obxectivamente de especial interese para a poboación, como a Sanidade pública e o Ensino”.
