- A Comisión de Peticións do Parlamento Europeo comunica que admite a trámite a denuncia que presentara SOS Panadeira en marzo
- Lídia Senra valora moi positivamente este paso na loita contra a privatización de espazos públicos como son as praias
Santiago, 16 setembro 2016. A desfeita medioambiental que supón a ampliación do Real Club Náutico de Sanxenxo e a privatización das praias urbanas da Iriña e A Panadeira para intereses do empresario Pedro Campos Calvo Sotelo están no punto de mira da Unión Europea (UE). E é que a Comisión de Peticións do Parlamento Europeo ven de admitir a trámite a denuncia presentada neste organismo o pasado mes de marzo por SOS Panadeira e ven de anunciar que lle pedirá á Comisión Europea que efectúe unha investigación sobre se no proxecto do Real Club Náutico de Sanxenxo se está a infrinxir a lexislación da Unión Europea (UE), tal e como demandou o colectivo pontevedrés.
O colectivo SOS Panadeira presentou o pasado mes de marzo unha solicitude á Comisión de Peticións do Parlamento Europeo denunciando que a ampliación do Real Club Naútico de Sanxenxo, vinculado ao empresario Pedro Campos Calvo Sotelo, supón a privatización de dúas praias urbanas, A Iriña e A Panadeira da localidade pontevedresa. SOS Panadeira considera no seu escrito que este proxecto perpetra un “descalabro medioambiental” e incumpre as directivas europeas 2014/55/UE de 16 de abril, 200/29/CEE de 11 de maio e outras referencias mundiais como A Carta da Terra, xa que a execución e modificación dun proxecto privado de ocio e “innecesario”, como é o Real Club Naútico de Sanxenxo, non sería desmontable tal e como reza a obrigatoriedade deste tipo de concesións. Neste sentido, instaban á Comisión de Peticións a posicionarse sobre se ía permitir que fosen violadas as Directivas Europeas mencionadas sen levarse a cabo unha investigación.
Agora, con data de 5 de setembro do 2016, Cecilia Wikström, presidenta da Comisión de Peticións, ven de remitir unha comunicación a SOS Panadeira informando de que a súa petición foi examinada e que o organismo europeo decidiu que os asuntos plantexados cumpren os requisitos de admisión a trámite, por tratarse dun “asunto que incide no ámbito de actividades da UE”. Informa tamén de que a Comisión de Peticións iniciou xa o exame da solicitude e decidiu “pedirlle á Comisión Europea que leve a cabo unha investigación preliminar sobre os diferentes aspectos do problema”, proseguindo o exame da denuncia.
Desde Alternativa Galega de Esquerda en Europa (AGEe), a eurodeputada Lídia Senra está a acompañar a SOS Panadeira en todo o procedemento desde o inicio. En efecto, foi ela quen convidou a cinco representantes de SOS Panadeira a acudir ao Parlamento Europeo, a Bruxelas, o pasado mes de febreiro, para trasladar a situación que está a vivir a veciñanza de Sanxenxo en relación á ampliación do Real Club Náutico. Lídia Senra valora como “moi positiva” a admisión a trámite da denuncia na Comisión de Peticións e asegura que se trata dun “paso máis” na loita contra a privatización de espazos públicos xa que, de non pararse a desfeita, “é moi posible que A Iriña e A Panadeira se convertan nas primeiras praias privatizadas de toda Europa”, como insiste o colectivo denunciante.
A eurodeputada tamén rexistrara no pasado mes de febreiro unha pregunta parlamentaria para poñer en coñecemento da CE a situación que agora será investigada.
