- O Comisario Hogan asúmeo na resposta a unha comunicación dirixida por AGEe con motivo do cese de recollidas imposto por Leche Celta
- A baixa demanda e o incremento da produción provocado pola liberalización, comezan a ser asumidos como problemáticos pola UE
Bruxelas, 22 Febreiro 2016. O pasado 28 de xaneiro a eurodeputada de Alternativa Galega de Esquerda en Europa (AGEe), Lídia Senra, púxose en contacto directo co Comisario de Agricultura Phil Hogan a través dun correo electrónico no que lle trasladaba a súa preocupación diante do anuncio realizado neses mesmos días pola industria Leche Celta en relación ao cese de recollida en 50 explotacións da provincia de Lugo a partir de febreiro.
Na resposta remitida, Hogan recoñécelle a Senra que na actualidade o sector leiteiro europeo está a padecer “condicións difíciles” -“especialmente difíciles” para os produtores/as do Estado español- debido ao “incremento substancial da produción láctea en todo o mundo, unida a unha demanda global debilitada”.
É dicir, o Comisario asume as predicións das consecuencias negativas para o sector froito da liberalización total do mercado logo da finalización do sistema de cotas, avanzadas e reiteradas tanto pola eurodeputada Lídia Senra[1] como por numerosas representantes do sector convidadas por AGEe a Bruxelas durante todo o ano 2015, entre as que destacaron a Secretaria Xeral do SLG, Isabel Vilalba, durante a súa participación na audiencia pública “O paquete lácteo e as perspectivas para o sector leiteiro” convocada pola Comisión de Agricultura do Parlamento Europeo, así como o seminario europeo organizado pola deputada de AGEe o pasado mes de setembro baixo o título “O impacto da liberalización do sector lácteo en Europa: que futuro?“, ao que acudiron representantes do sector leiteiro a nivel europeo e global.
Porén, no actual escenario de ausencia de controis públicos á produción, a Comisión Europea desbota nesta resposta asumir a súa fundamental responsabilidade na xeración deste contexto salvaxe, e limítase a enunciar que “o obxectivo non é producir tanto como se poida, senón tanto para o que haxa mercado”, obviando tamén por completo unha cuestión totalmente básica, como é o feito de que os baixos prezos do leite impostos polas industrias obrigan ás explotacións leiteiras a tentar vender o maior número de litros posíbeis a fin de poder facer fronte aos custos de produción e aspirar a remunerar o seu propio traballo.
Aliás, resulta indignante que, ao máis puro estilo da teoría económica capitalista clásica que lle ten fe a unha “man invísibel” que manexa os mercados[2], a Comisión Europea propón nesta resposta a AGEe que os produtores/as e outros operadores “segan as sinais do mercado”. Un mercado, lembremos, carente de control público e, a día de hoxe, estruturado en torno as dinámicas especulativas, máis pendentes da cotización do leite que das coherencia e calidade das estratexias produtivas.
Finalmente, Hogan propón á eurodeputada de Alternativa Galega de Esquerda en Europa, que “chame a atención das autoridades españolas, dado que o Ministerio de Agricultura é o gardián dos acordos lácteos que inclúen, entre outros, un compromiso sobre a recollida de leite”.
Lídia Senra reivindicou hoxe dende Bruxelas que as gandeiras e gandeiros, para poder vivir da súa actividade profesional, “non só precisan garantía de recollida, se non tamén a fixación dun prezo por litro que cubra custos de produción e remunere o seu traballo”. A eurodeputada galega criticou asemade a actitude da Ministra de agricultura, Isabel García Tejerina, quen “no só eludiu sentarse a negociar cas gandeiras e gandeiros, senón que deu mostra dunha total irresponsabilidade ao non estar tendo a mínima capacidade de reacción ante situacións como o cese de recollida de Leche Celta”. Senra foi tamén moi dura contra o goberno da Xunta, tildándoo de “incapaz” e acusándoo dunha “total deixadez” que está a implicar “o completo abandono dun dos sectores produtivos máis importantes do noso país”.
A eurodeputada de AGEe reiterou novamente que a única posibilidade de acadar un escenario comercial que non abafe ás explotacións galegas é “a través do establecemento dunha política pública con instrumentos de regulación da produción e os mercados”.
[1]Compilación dos principais posicionamentos públicos de AGEe en demanda do control público da produción e mercado lácteos: Lídia Senra sobre a revisión do paquete lácteo na Comisión de Agricultura (5 de Novembro 2014); Apoio mobilización do sector leiteiro en Bruxelas fronte ao fin do sistema de cotas (31 de Marzo 2015); Senra denuncia o abandono do sector leiteiro por parte do PP e o PSOE (6 de Maio 2015); Lídia Senra denuncia a “destrucción” da capacidade de negociación colectiva das labregas e labregos (9 de Xuño 2015); Fracaso do “Paquete lácteo” (7 de Xullo 2015); Lidia Senra: “Non hai solución de futuro que non pase por voltar á política leiteira pública” (15 de Setembro); Lídia Senra: “Sen prezo e sen control da produción non hai futuro para o sector leiteiro” (23 de Setembro 2015); Denunciamos ante a Comisión Europea a xustificación da CNMC no abuso de poder no sector leiteiro (24 de Setembro 2015); Lídia Senra esixe a posta en marcha de medidas que reforcen o poder negociador do sector produtor (12 de Novembro 2015).
[2]Teoría do economista Adam Smith introducida a través da obra The Theory of Moral Sentiments (1759), e popularizada con An Inquiry into the Nature and Causes of the Wealth of Nations (1776).
