- Lídia Senra esíxelle a De Guindos e tamén a Feijóo que actúen con transparencia e expliquen os recortes previstos en pensións, sanidade e educación
- A eurodeputada participou nun acto diante do Parlamento Europeo para esixir que se anule a multa ao Estado español e a Portugal
Santiago, 7 xullo 2016. Lídia Senra, eurodeputada de Alternativa Galega de Esquerda en Europa (AGEe), integrada no Grupo Confederal da Esquerda Unitaria Europea/Esquerda Verde Nórdica (GUE/NGL), acusou este xoves ao Partido Popular de “vender fume coa complicidade da Comisión Europea para gañar as eleccións e poder así seguir aplicando as políticas de austeridade en favor dos mercados e do gran capital”. Senra reacciona así ante a decisión do Colexio de Comisarios, que hoxe adoptou o ditame negativo sobre as medidas tomadas polo Goberno do Estado español para cumprir os obxectivos de déficit pactados coa UE, o que activa o proceso que pode derivar nunha multa ao Estado español con ata 2.000 millóns de euros e a conxelación de parte dos fondos comunitarios que lle corresponden.
A Comisión Europea sostén que España se desviou no obxectivo de déficit en 2014 nunha décima (5,9% fronte ao 5,8% pactado) e en 2015 –ano electoral- nun punto (5,1% fronte ao 4,2% pactado) e incide en que “as medidas de saneamento do sistema de pensións e as administracións públicas” adoptadas no Estado español, “non teñen sido suficientes para compensar as medidas expansivas”.
“O PP vendeu fume para poder gañar as eleccións e ten actuado irresponsablemente reducindo ao límite os impostos aos máis ricos e aumentando os impostos indirectos, transformando os desmáns da banca en débeda pública, lexislando para facilitar a elusión fiscal, non perseguindo os paraísos fiscais, e mesmo con implicacións en casos de corrupción”, dixo a eurodeputada de AGE.
“Se finalmente a dereita segue a gobernar no Estado español aumentará os impostos indirectos, que son os que afectan ás clases populares, e continuará co austericidio e a política de recortes de servizos públicos de cara a cumprir o que esixe Bruxelas”, denunciou Lídia Senra.
Neste sentido, reclámalle ao Ministro de Economía en funcións, Luis de Guindos, quen se amosaba esta semana convencido de que a UE non vai multar ao Estado español, que antes de que os parlamentarios e parlamentarias voten na sesión de investidura do novo Goberno –o pobo xa o fixemos o 26 de xuño nas eleccións-, nos diga a todas e todos que vai facer o PP para cumprir co esixido por Bruxelas. Que explique exactamente o que vai supoñer aplicar os compromisos do memorando tanto en recortes en sanidade, educación, salarios, funcionarios e funcionarias e quen sabe se finalmente, nas pensións tamén, para dunha vez por todas acadar os obxectivos neoliberais de privatizar as pensións mediante a contratación privada de plans de pensións e tamén en canto a reformas (laboral, administración,…).
Desde AGEe esixímoslle á CE que non se aplique a sanción por incumprimento de déficit ao Estado español e a Portugal e que permita unha marxe de manobra orzamentaria que posibilite manter os servizos públicos e facer políticas activas de creación de emprego e calidade. Ao mesmo tempo, reclamámoslle ao Goberno español que volva reverter a situación e que empece a cobrarlle aos bancos e ás grandes empresas a débeda pública da que son responsables, incluíndo intereses.
Tamén lle demandamos claridade ao presidente da Xunta, Alberto Núñez Feijóo, e que deixe de dicir que isto non vai con Galiza e de enganar á cidadanía nas vésperas das eleccións galegas previstas para este outono.
