- O Parlamento Europeo aprobou hoxe un informe criticando a Nova Alianza para a Seguridade Alimentaria e a Nutrición ideada polo G8
- Transnacionais como Monsanto, Syngenta, Cargill ou Yara agóchanse tras este macroproxecto público-privado ca complicidade dos gobernos
Estrasburgo, 07 Xuño 2016. A denominada Nova Alianza Nutricional para África[1] é unha iniciativa lanzada no ano 2012 polo presidente estadounidense Barack Obama, identificada como unha asociación entre países do G8, gobernos africanos e principais empresas agroindustriais como Monsanto, Syngenta, Cargill ou Yara.
Tras o debate que tivo lugar onte en sesión plenaria do Parlamento Europeo en Estrasburgo, hoxe procedeuse á votación dun informe de posición ao respecto.
A eurodeputada de Alternativa Galega de Esquerda en Europa (AGEe), Lídia Senra, titular para o Grupo da Esquerda Verde Nórdica-Esquerda Unitaria Europea (GUE/NGL) na Asamblea Paritaria UE-África, Caribe, Pacífico, valorou hoxe positivamente a aprobación dun documento “que deixa ben claro que as sinaladas como colaboracións público privadas están destinadas a garantir posicións dominantes para as grandes empresas, neste caso as agroindustriais”.
“É tamén relevante que o Parlamento Europeo teña asumido hoxe as graves consecuencias que os programas de axuste estrutural impostos polo Banco Mundial e o Fondo Monetario Internacional nos anos 80 provocaron nos países empobrecidos”, valorou Senra. Aliás, o informe chama a atención sobre a necesidade de promover a promoción da produción alimentar dirixida ao consumo interno, e tentar eludir o desvío da produción agrícola cara os mercados internacionais, extremadamente volátiles.
“A Nova Alianza para a Seguridade Alimentaria e a Nutrición é unha das maiores manobras neocoloniais destes últimos anos”, identificou a eurodeputada galega, “e en lugar de rematar ca fame o que busca é seguir afondando na inhumana consideración de que o continente africano é unha mera despensa de recursos para os países enriquecidos”.
[1]Trátase dunha una colaboración público-privada (CPP) de gran envergadura. Participan nela membros do G-8, a Unión Africana (UA), a Nova Alianza para o Desenvolvemento de África (NEPAD), os Gobernos de Burkina Faso, Benín, Costa de Marfil, Etiopía, Ghana, Malaui, Mozambique, Nixeria, Senegal e Tanzania, así como empresas locais e internacionais. Cada país africano participante aprobou un marco de cooperación nacional (MCN) no que se comprometeu a facer as reformas lexislativas que sexan pertinentes para aplicar este modelo de esquilmamento de recursos. As 180 empresas involucradas neste negocio van inverter 8.000 millóns de dólares -só a Monsanto tivo xa un beneficio de 1.480 millóns de dólares no ano 2013-. Dúas das 180 empresas partícipes deste negocio destacan por ocupar un papel principal na produción agroindustrial: a empresa suíza de sementes Syngenta e a norueguesa Yara International, centrada nos abonos nitroxenados empregados neste modelo, principais causantes do cambio climático .
