- Estivo hoxe pola mañá repartindo información da campaña electoral no Mercado da Praza de Lugo, na Coruña, acompañada por Luís Villares e Luz Marcos Buján
- A eurodeputada e candidata á reelección, que esta tarde se reunirá coa Confraría da Coruña, sitúa como prioridade tamén a limpeza e rexeneración das rías
CORTE AUDIO DECLARACIÓNS DE LÍDIA SENRA HOXE PINCHANDO AQUÍ
A Coruña, 15 de maio de 2019. A eurodeputada Lídia Senra, candidata de En Marea: Compromiso por Europas ás eleccións europeas do 26 de maio, estivo este mércores pola mañá na Coruña, repartindo información da campaña electoral no Mercado da Praza de Lugo, acompañada polo voceiro de En Marea, Luís Villares, polo deputado no Parlamento Galego Pancho Casal, e pola membro da lista electoral europea, veciña de Oleiros, Luz Marcos Buján. Senra tivo a oportunidade de conversar coas persoas que atenden os postos do mercado, algunhas delas ben coñecidas por ella, pois durante anos, antes de ser eurodeputada, tamén tivo un posto de venda de produtos neste mercado.
En declaracións aos medios, a candidata reclamou que as Administracións deben dar exemplo, tanto a UE como a Xunta como o Estado español, e promover o consumo de produtos procedentes da pesca local e artesanal. “A pesca artesanal e de pequena escala é fundamental neste país, xera moitos postos de traballo directos e indirectos na Galiza. A UE debe defendela e ademais de políticas específicas adaptadas a estas flotas, é moi importante que se promova o consumo do pescado que traen estes barcos. A Praza de Lugo xoga un papel moi importante na venda de peixe na comarca da Coruña e as Administracións públicas debe apostar decididamente por comprar estes produtos para abastecer os comedores públicos, falo de que os servizos que levan as comidas nas escolas, hospitais, etc, se abastezan dos produtos da pesca artesanal e dos produtos agrícolas e gandeiros do comercio local e galego”, defende.
Lídia Senra tamén marcou como prioridade para seguir traballando durante os próximos 5 anos, a defensa da limpeza e da rexeneración das rías galegas e poñerlle freo ás industrias que contaminan as augas. A candidata estará pola tarde nun encontro no porto de Oza, reunida con membros da Confraría de Pescadores, cos que ao longo deste mandato xa mantivo fluido contacto para defender a rexeneración da ría do Burgo. A eurodeputada comprométese a seguir traballando neste sentido, ao lado dos mariscadores e mariscadoras por toda Galiza e da man do sector pesqueiro de pequena escala.
“O dereito a empregos dignos e seguros e a supervivencia dos nosos sectores produtivos e dos territorios que viven deles deben estar por riba dos intereses do capital. O sector pesqueiro afronta na próxima lexislatura desafíos coma o Brexit, novas medidas técnicas ou a obriga de desembarque que fan imprescindible continuar tendo unha voz forte no Parlamento Europeo na defensa dos pescadores e pescadoras das frotas artesanal e de pequena escala”, zanxou.
