- AGEe acadou a aprobación dunha emenda na resolución de opinión do Parlamento sobre a nova PPC, logrando especificar esta exclusión
- Lídia Senra rexistrou onte unha pregunta parlamentaria dirixida á Comisión Europea para saber se esta enmenda vai ser tomada en conta
Bruxelas, 29 Xaneiro 2016. O pasado mes de decembro a Eurocámara procedeu á aprobación dunha emenda[1] rexistrada por Alternativa Galega de Esquerda en Europa (AGEe), insertada na resolución do Parlamento Europeo (PE) Unha nova PPC: estrutura para as medidas técnicas e para os plans plurianuais, co fin de que no texto final deste informe ficase especificado que “a pesca artesanal accidental nas augas interiores dos Estados e das rexións debe permanecer fóra dos TAC[2]“. A nivel galego, isto suporía que as embarcacións que se adican a artes de enmalle[3], como por exemplo as betas ou os miños, non se verían obrigadas a tirar unha parte dos lotes de peixe capturado ao mar, minimizando deste xeito as grandes perdas que están a ter a día de hoxe.
Dita emenda foi elaborada a partir da información proporcionada polo Patrón Maior da Confraría de Cangas, Francisco Javier Costa, durante a realización da xornada “As pescas e a acuicultura na Galiza no contexto da Política Pesqueira Común (PPC): retos e propostas de futuro”, convocada por AGEe o pasado mes de novembro nesta vila do Morrazo.
Así, avanzando na reivindicación do sector de que a pesca artesanal galega accidental estea libre de TAC’s e cotas dentro das augas interiores, a eurodeputada de AGEe Lídia Senra rexistrou onte unha pregunta parlamentaria dirixida á Comisión Europea interpelando directamente á Comisión Europea para que concrete se vai “tomar en consideración este punto da Resolución do Parlamento Europeo” e, en caso afirmativo, “que accións emprenderá para que se faga efectivo nos Estados membro e en qué prazo”.
A eurodeputada galega destacou a relevancia para Galiza de incorporar esta consideración na PPC, subliñando que “este é un aspecto moi importante para manter a economías das pequenas embarcacións que se adican á pesca artesanal e abastecen os mercados diarios de peixe fresco”.
[1] Punto 25 da resolución Unha nova PPC: estrutura para as medidas técnicas e para os plans plurianuais
[2] Información sobre TAC e cotas na PPC: http://ec.europa.eu/fisheries/cfp/fishing_rules/tacs/index_pt.htm
[3] Artes de enmalle na pesca artesanal: http://www.pescadoartesanal.com/gl/artes-de-pesca-galicia/
Imaxe: EFEagro
