- A eurodeputada informa á Comisión Europea sobre as accións xudiciais contra o actor por insultar nas redes sociais a Deus e á Virxe María
- “De verdade, van adicarse a procesar á xente por xurar nun Estado que se di aconfesional?”
Bruxelas, 26 de Setembro de 2018. Lídia Senra, eurodeputada galega integrada no Grupo Confederal da Esquerda Unitaria Europea/Esquerda Verde Nórdica (GUE/NGL), considera que no Estado español “estamos asistindo día tras día a unha preocupante criminalización da liberdade de expresión e xa nin se respectan os dereitos fundamentais das persoas”. Así o asegurou hoxe, despois de que se dera a coñecer que o tribunal vén de procesar finalmente ao actor Willy Toledo por insultar nas redes sociais a Deus e á Virxe María.
A eurodeputada ten rexistrado durante a presente lexislatura numerosas preguntas parlamentarias dirixidas á Comisión Europea denunciando a continua vulneración do dereito á liberdade de expresión no Estado español[1] e, desta volta, tomando como exemplo a situación do actor Willy Toledo, insiste novamente ao ente comunitario. Senra describe no seu texto como este actor foi denunciado pola Asociación Española de Abogados Cristianos, acusado de ter cometido un presunto delito de ofensa aos sentimentos relixiosos ao escribir nas redes sociais un comentario de apoio ás mulleres ás que se lles abriu xuízo oral por participar nunha procesión que paseou unha vaxina de plástico polas rúas de Sevilla co obxectivo de criticar publicamente o machismo católico.
Dado que a xustiza española admitiu a trámite a denuncia, Willy Toledo foi detido hai unhas semanas e pasou unha noite nos calabozos, sendo obrigado a declarar diante dun xuíz, que agora acaba de decidir procesar ao investigado. “Esta investigación é totalmente absurda. De verdade vanse adicar a procesar á xente por xurar nun Estado que se di aconfesional? Máis que ser propia do que deberiamos agardar dun sistema xudicial do século XXI, situacións coma esta retrotráennos á Idade Media, cando as persoas consideradas blasfemas eran conducidas pola forza diante do Tribunal da Inquisición”, critica Senra.
Para concluír, a eurodeputada galega lembra no texto dirixido á CE que a liberdade de expresión está protexida polo Artigo 11 de la Carta Europea dos Dereitos Fundamentais, e pídelle que aclare se baixo o seu punto de vista o acontecido a Willy Toledo supón a violación deste dereito. Ademais, subliña, “xa que continuamente estamos asistindo a casos similares no Estado español, pensan tomar algunha medida?”
[1]Preguntas rexistradas pola eurodeputada Lídia Senra dispoñíbeis neste enlace: http://www.europarl.europa.eu/meps/PT/125049/MARIA+LIDIA_SENRA+RODRIGUEZ_activities.html
