A eurodeputada de Alternativa Galega de Esquerda en Europa (AGEe), Lídia Senra, participou esta fin de semana novamente en diferentes actos electorais na provincia de Lugo e de Pontevedra en apoio á candidatura En Marea para as Eleccións Xerais do Estado Español do 20 de decembro.
Lídia Senra interviu o venres pasado nun mitin en Quiroga, día que tamén aproveitou para visitar a Fundación Uxío Novoneyra no Courel. Xa o sábado, o periplo electoral levouna a Lalín, Silleda e Viveiro. Foi nesta localidade da Mariña lucense onde tivo lugar o acto electoral máis concorrido, que contou coa participación tamén do potavoz nacional de Anova e deputado no Parlamento galego, Xosé Manuel Beiras; do cabeza de lista de En Marea por Lugo, Miguel Anxo Fernán-Vello; do número 3 da lista de En Marea por Lugo, José Manuel Pérez Afonso; da número 4, Sol González-Ruiz Carcur; e do deputado galego Ramón Vázquez Díaz. Nos actos de Pontevedra, Lídia estivo acompañada polo deputado galego Antón Sánchez e pola número 4 da lista de En Marea por Pontevedra e concelleira de Lalín, Lara Rodríguez.
Xa o domingo, Senra achegouse ao mediodía ata Castroverde, para falar, en compañía do propio Fernán-Vello e do secretario xeral de Podemos-Galicia Breogán Riobóo, cos veciños da zona da montaña lucense. Á tardiña, un mitin en Escairón puxo o punto e final á participación da eurodeputada na campaña electoral por Galiza desta fin de semana.
Durante todos os actos, Lídia Senra insistiu na necesidade de facerlle fronte ás políticas neoliberais e de austeridade impostas nos últimos tempos polos Gobernos do PP.
“Temos a necesidade de dar a batalla ata as últimas consecuencias para que non desaparezan as conquistas logradas despois de moitos anos de loita e que levaron a que poideramos ter un ensino e unha sanidade pública, por exemplo”, defendeu.
“Os servizos públicos están en perigo agora mesmo e nas eleccións do 20 de decembro En Marea debe entrar con forza no Parlamento do Estado para poder atallar esta situación de risco. En Marea é a casa común das xentes que queremos quitar á dereita do poder”, dixo.
No acto de Quiroga Lídia Senra dixo alto e claro que é necesario ter políticas específicas para protexer as zonas de montaña. “Cómpre unha política decidida para o desenvolvemento da agricultura e a gandaría na montaña, políticas específicas que apoien a actividade na montaña e o desenvolvemento nestas zonas. Na montaña precísase blindar os servizos públicos, a sanidade, a educación e unha atención a maiores pública e de calidade”.
“En Austria, por exemplo, vese perfectamente como o Goberno leva a cabo un apoio decidido para manter á xente na montaña e as súas actividades. Sen embargo, aquí, nin por parte do Goberno Estatal nin por parte da Xunta de Galiza hai esa actitude. Manter a montaña é imprescindible para a sociedade. Non se pode pensar en ter un país desenvolvido se a montaña está abandonada como pretende o Partido Popular”, advertiu.
En Lalín, Senra aproveitou para deixar claro que En Marea é unha “candidatura galega, moi diversa no seu interior e que inclúe por suposto unha forte compoñente nacionalista”.
“O PP e o PSOE están promovendo leis para roubarnos o ben común que nos queda á cidadanía e convertelo en mercado. Temos que paralos, parar a política que está acabando cos postos de traballo na pesca e no campo. E iso só poderá ser se entramos con forza e con grupo propio no Parlamento do Estado”, resaltou.
En Silleda, a eurodeputada defendeu a necesidade de pelexar por un prezo mínimo do leite que garanta uns salarios dignos no sector e cubra os custos. “Se queremos saír da crise, ten que haber regulación da produción e priorizar os mercados internos. Somos de esquerdas e queremos un medio rural vivo. O agro e a gandeiría van En Marea”.
Cun Conservatorio da Música totalmente ateigado de xente, en Viveiro Lídia Senra alertou sobre o feito de que “a aplicación das políticas de austeridade do bloque neoliberal estannos levando a que en Galiza volva a haber fame”.
“En Marea debemos marcarnos como obxectivo conseguir o acceso de toda a poboación a unha alimentación sana, suficiente e de calidade. Para iso precisamos que haxa labregas e labregos producindo no noso país e manter a pesca artesanal e costeira”.
“É necesario manter como bens públicos a agua, a terra e as sementes. Loitaremos contra todas as leis que supoñan a privatización da auga, o acaparamento de terras e a apropiación das sementes”, afirmou.
Así mesmo, explicou que desde En marea “tamén nos opoñenos a que dentro da relectura que está facendo a Comisión Europea da normativa de transxénicos sexan consideradas como non transxénicas novas técnicas de reprodución que si que o son”.
“Dicimos NON a que as nosas costas sexan ocupadas pola acuicultura industrial. Non imos permitir q se arruine a nosa pesca”, concluiu.
E no acto de Escairón Lídia aclarou que “toda a cidadanía fai política desde o momento en que se mobiliza e protesta”.
“En Marea pensamos que Galiza ten dereito a decidir como se quere gobernar e ou paramos as políticas de austeridade ou o PP levaranos ao desmantelamento total dos servizos públicos. A situación de Grecia podemos vivila aquí nun futuro non moi lonxano se non mudan as cousas”, alertou.
“Non fai falta que as multinacionais veñan aquí roubar a nosa riqueza por catro pesos. Recuperemos os mercados locais, apostemos por producir a nosa alimentación”, concluiu.
