- Ás 20:00hrs. na Libraría Andel, coa eurodeputada Lídia Senra, a edil Marga López e a voceira da Rede de Mulleres contra os Malos Tratos Rosa Fontaíña
- Senra chama a combater as resistencias que hai á entrada de mulleres feministas nos órganos de dirección das organizacións e nas listas electorais
Vigo, 26 de abril de 2018. A Libraría Andel de Vigo (Avenida das Camelias, 102) acollerá este venres, 27 de abril, a presentación do libro “O feminismo, imprescindible para construír outra Europa” coordinado pola eurodeputada Lídia Senra. No acto público, que dará comezo ás 20:00 horas, intervirán ademais da propia europarlamentaria, a concelleira de Vigo Margarida López, e a coordinadora da Rede de Mulleres Veciñais contra os Malos Tratos de Vigo Rosa Fontaíña.
Senra defende que as medidas de acción positiva cara á igualdade levadas a cabo nos últimos anos como as cotas de participación foron un paso moi importante, pero chama a “seguir loitando” porque “aínda hai moitas organizacións onde nin sequera se ten asumido a paridade formal”. “Necesitamos seguir combatendo as resistencias das organizacións á entrada de mulleres feministas nos seus órganos de dirección ou nas listas electorais, e necesitamos romper ese teito de cristal no que, a pesar de ter acadado o obxectivo da paridade, se nos consagra ás mulleres como eternas segundonas”, reclama a eurodeputada. Así mesmo, ve “imprescindible facer unha avaliación profunda da situación e dotar de medios e dunha sólida formación con perspectiva de xénero a todas as persoas que teñen que implementar e aplicar leis das que nos imos dotando para garantir os dereitos das mulleres”.
Ademais da versión impresa, que conta cunha tirada inicial de 1.500 exemplares e que se está repartindo xa de xeito gratuíto por toda Galiza, o libro está dispoñible tamén en aberto na súa versión dixital na propia web de Lídia Senra. Despois da cita deste venres en Vigo, o sábado 5 de maio está previsto un acto ás 19:00 horas na Sala Abanca da Estrada para presentar o libro tamén alí; e o venres 11 de maio, ás 19:30 horas, terá lugar a presentación do libro no Ateneo Ferrolán.
A publicación recolle textos de mulleres que participaron na xornada organizada por Senra en novembro do 2016 en Ourense co mesmo título que o libro e na visita realizada ao Parlamento Europeo en novembro do 2015 para participar na xornada “O nesgo machista na aplicación das políticas: o caso da Xustiza”. Así, na primeira parte recóllense artigos da feminista e profesora da Universidade de Valladolid Alicia H. Puleo, sobre o ecofeminismo; da brasileira doutoranda en socioloxía Eliane de Moura Martins, sobre o feminismo popular para facerlle fronte á colonialidade, ao capitalismo depredador e a todas as formas de machismos; de Fiadeiras, o Grupo de Traballo en Igualdade do Colexio de Educadoras e Educadores Sociais de Galicia (CEESG), sobre a acción social desde o feminismo e a súa experiencia de traballo; das membros de Anova Ourense Nerea Conde e Tania Bouzo, sobre participación política e liderado feminino; da deputada Paula Verao, sobre a loita contra a precariedade e pobreza laboral feminina; e da Decana do Colexio Oficial de Psicoloxía de Galiza, Rosa Álvarez, sobre como os micromachismos cimentan o patriarcado.
Na segunda parte do libro, recóllense artigos da eurodeputada do GUE/NGL Ángela Vallina, sobre a figura da Síndrome de Alienación Parental (SAP) como reforzo do heteropatriarcado nas sociedades europeas; da concelleira de Marea de Vigo Marga López Barreiro, sobre o nesgo machista na xustiza; da psicóloga clínica forense e experta en vitimoloxía e violencia de xénero Sonia Vaccaro, sobre a utilización do SAP como unha forma de violencia machista máis; da Rede de Mulleres Veciñais Contra os Malos Tratos de Vigo, sobre as dificultades da violencia machista nos procesos xudiciais; de Estrela Gómez Viñas, coordinadora da Asociación Galega contra o Maltrato a Menores (AGAMME), sobre por que se debe incluír a cuestión dos dereitos da infancia no debate sobre o nesgo de xénero presente nas institucións; da coordinadora da Área de Mulleres do Sindicato Labrego Galego (SLG), Ana Eiras, sobre a realidade das mulleres labregas; e de Rosa Álvarez novamente, desta vez cunha ollada desde a psicoloxía á violencia contras as mulleres para unha abordaxe integral do problema.
