- Organiza a eurodeputada Lídia Senra e interveñen Xavier Vence, Javier Vázquez Lamas e Ana Rodríguez explicando as perspectivas económicas
- É na Facultade de Filosofía de Compostela de 10:30 a 14:00 e de 16:00 a 17:15 horas e está aberto a todas as persoas que queiran asistir
Santiago, 10 de marzo de 2018. A Aula 2 da Facultade de Filosofía de Santiago de Compostela (Praza de Mazarelos) acolle este sábado unha xornada sobre os ‘Fondos europeos na Galiza para o 2021-2017’, un evento aberto a todas as persoas que queiran asistir e que se desenvolverá de 10:30 a 14:00 e de 16:00 a 17:15. Organizada pola eurodeputada galega Lídia Senra, a xornada contará con varias mesas informativas, nas que participarán como relatores o catedrático de Economía Aplicada da USC Xavier Vence; o asesor do Grupo Municipal de Compostela Aberta Javier Vázquez Lamas; e a economista Ana María Rodríguez.
Concretamente, nas sesións da mañá, Vence ofrecerá unha visión das perspectivas económicas da Unión Europea e os escenarios que se nos plantexan para Galiza, mentres que Javier Vázquez abordará o caso concreto do Concello de Santiago e ofrecerá unha visión municipal do acceso aos fondos. Ana Rodríguez, xa pola tarde, realizará un repaso dos fondos europeos que se están aplicando no actual período de programación 2014-2020 na Galiza.
Na Galiza, os fondos da Unión Europea seguen tendo moita importancia para o desenvolvemento dalgúns sectores sobre todo. No ano 2018 están previstos nos orzamentos da Comunidade Autónoma 542 millóns de euros dos distintos fondos, sendo os principais en contía o FEDER (Fondo Europeo de Desenvolvmento Rexional) e o FEADER (Fondo Europeo Agrario de Desenvolvemento Rural). A esta cantidade hai que engadir outros proxectos que presentan directamente os Concellos aos Programas Estatais ou os que poden presentar distintas Administracións, Universidades, empresas ou organizacións, directamente á Comisión Europea (CE). A maiores está tamén FEAGA (Fondo Europeo Agrícola de Garantía), que é o fondo responsable do pago do primeiro pilar da Política Agraria Común (PAC) e que pode supoñer uns 170 millóns anuais.
De todo isto falarase na xornada, tendo en conta que a CE está en plena negociación dos fondos da Unión Europea e decídese o Marco Financeiro para o periodo 2021-2027. “A fixación do Marco Financeiro vai fixar as prioridades políticas e este é o momento de debater que tipo de Europa queremos para os próximos sete anos. Está en debate a agricultura que queremos, se Galiza queda fora dos fondos estruturais ou se eses fondos que lle poden quitar a Galiza a UE os vai destinar a defensa, por exemplo”, explica Lídia Senra. “Queremos que o seminario sirva de debate entre as persoas que asistan para os futuros escenarios. Reclamamos tamén que a Administración galega se implique e que non sexa unha mera espectadora das decisións que tome o Goberno do Estado español”, defendeu a eurodeputada.
