- A eurodeputada faise eco das denuncias de dispersión realizadas polas familias dos presos políticos saharauis do campamento Gdeim Izik
- Esixe que se respecten os seus dereitos humanos, e reitera o seu apoio ao dereito do pobo saharaui ao referendo de autodeterminación
Bruxelas, 19 de Setembro de 2017. Persoas achegadas aos presos políticos saharauis do campamento Gdeim Izik, veñen de trasladarlle á eurodeputada galega integrada no Grupo Confederal da Esquerda Unitaria Europea/Esquerda Verde Nórdica (GUE/NGL), Lídia Senra, a denuncia dunha nova vulneración dos dereitos humanos destes líderes sociais, vítimas dun xuízo civil cheo de irregularidades por parte do Goberno de Marrocos o pasado mes de xuño.
Na madrugada deste sábado día 16, dezaoito dos dezanove presos que se atopaban no cárcere de marroquí de Aarjat foron sacados das súas celas e dispersados en seis prisións. Este medida parece ser precisamente unha represalia pola solicitude realizada previamente por estas persoas de seren trasladadas a centros penitenciarios máis próximos ao territorio ocupado de El Aaiún, para así poderen estar perto das súas familias. Tras unhas primeiras horas de incomunicación, nas que nin as propias familias puideron ter acceso á información sobre o seu paradoiro, finalmente os últimos datos sitúanos en centro penitenciarios que se atopan entre 460 e 1346kms de distancia de El Aaiún.
A eurodeputada Lídia Senra, que ten amosado xa a súa solidariedade cos presos de Gdeim Izik en varias ocasións[1], sumouse ás solicitudes de liberación inmediata e esixíu “un compromiso contundente da UE cos dereitos humanos destes activistas”. Nesta liña, insta a comezar “asumindo que non se pode establecer acordos económicos cun país como Marrocos, que pretende facer negocio a costa dos dereitos do pobo saharaui e non dubida en empregar a violencia para manter o control e explotación dos seus recursos naturais”.
Senra lembrou tamén que o enésimo recoñecemento de que o territorio do Sáhara Occidental ten dereito á súa autodeterminación é precisamente unha sentenza ditada polo Tribunal de Xustiza da UE en decembro do 2016, que pon en entredito específicamente os acordos comerciais UE-Marrocos. “Abonda xa de mirar para outro lado, a ONU e a Unión Europea non poden seguir obviando a gravidade da violencia ca que o Goberno de Marrocos ataca reiteradamente ao pobo saharaui”– advertiu- “A dispersión é unha volta de torca máis desta violencia, e busca causar sufrimento non só nas persoas presas, senón tamén directamente ás súas familias e persoas achegadas”.
A eurodeputada galega comprometeuse a seguir de perto a situación dos dezanove presos de Gdeim Izik e denunciar, tanto publicamente como a nivel institucional dentro da UE, todas as vulneracións de dereitos humanos que o Goberno de Marrocos sega obstinado en cometer contra estes activistas sociais e as súas familias.
[1]Vídeo-declaracións de Lídia Senra condenando xuízo farsa ao que o Goberno de Marrocos está a someter ao s presos de Gdeim Izik (16 de xuño, 2017): https://www.facebook.com/LidiaSenraRodriguez/videos/1145607132211284/.
[NdP040717] A eurodeputada galega Lídia Senra reclama a liberación dos presos políticos saharauis
