- A eurodeputada galega posicionouse na sesión plenaria en contra dun informe do Parlamento que pretendía “lavar a cara” á globalización
- “A soberanía política, alimentaria e enerxética dos pobos do mundo é incompatible ca globalización”, lembrou
Estrasburgo, 13 de Setembro de 2017. A eurodeputada galega Lídia Senra, integrada no Grupo Confederal da Esquerda Unitaria Europea/Esquerda Verde Nórdica (GUE/NGL), posicionouse onte en contra do informe sobre Impacto do comercio internacional e das políticas comerciais da UE nas cadeas de valor mundiais por considerar que “é un lavado de cara á globalización e á Organización Mundial do Comercio (OMC), instrumentos do capitalismo para dominar o mundo e seguir concentrando a riqueza”. Dito texto, se ben parte do recoñecemento dos impactos negativos das políticas comerciais da Unión Europea (UE) e dos efectos adversos do actual réxime mundial de comercio e investimento, avoga polo plantexamento da posta en marcha de medidas -apenas esbozadas no informe-, cas que tentar probar a mitigar algunhas das graves consecuencias que a deslocalización e desmembramento a nivel mundial do proceso produtivo capitalista está a carrexar para as persoas e a Natureza.
Fronte a esta tentativa de xustificación da globalización apostando por “parchear” as súas consecuencias, Lídia Senra sinalou con contundencia que “non é reformábel” senón que “é preciso derrubala”. Fronte ao modelo homxeneizador e de concentración do poder impulsado polo capitalismo na súa fase neoliberal, a eurodeputada galega chamou a “construír relacións entre os pobos en pé de igualdade recuperando o seu dereito a decidir, relocalizando a produción, devolvendo os dereitos sociais, políticos e laborais roubados; protexendo os recursos naturais e o clima”.
A eurodeputada galega advertiu que a propia globalización da produción mundial constitúe un marco no que xustificar a posta en marcha de políticas, medidas e leis que lexitiman afondar no proceso de concentración da riqueza “a costa de desposuír de dereitos á clase traballadora e traspasando o dereito a decidir dos pobos, ademais de regalar competencias das institucións públicas ás transnacionais”.
“A soberanía política, alimentaria e enerxética dos pobos é incompatible ca globalización”, sentenciou.
