- A eurodeputada galega recrimina á vez á UE que intente dar leccións de dereitos humanos a terceiros países cando nos Estados membros se están a vulnerar a diario
- Defende que as relacións e o diálogo con Cuba teñen que partir do escrupuloso respecto das súas decisións, “sen intentar impoñer cambios que o pobo cubano non decida”
Estrasburgo, 5 de xullo de 2017. A eurodeputada galega Lídia Senra, integrada no Grupo Confederal da Esquerda Unitaria Europea/Esquerda Verde Nórdica (GUE/NGL), votou este mércores no pleno do Parlamento Europeo a favor do Acordo de Diálogo Político e Cooperación entre a UE e Cuba, á vez que votou en contra da resolución adxunta por considerala unha proposta totalmente “inxerencionista”. “Desde o meu grupo, o GUE/NGL, por suposto que apoiamos o acordo UE-Cuba que supón a normalización das relacións e remata coa Posición Común de 1996 da UE contra Cuba, pero votamos en contra da inxerencista resolución que propón este Parlamento Europeo”, explicou Senra durante unha intervención no pleno xa onte pola noite, previa á votación que tivo lugar hoxe.
A parlamentaria galega dixo “rexeitar o Instrumento Europeo para a Democracia e os Dereitos Humanos que ten como pretensión financiar á oposición e impulsar un cambio de réxime en Cuba”. “As relación e o diálogo con Cuba teñen que partir do escrupuloso respecto das súas decisións, sen inxerencias e sen intentar impoñer cambios que o pobo cubano non decida”, defendeu. “En Cuba non hai un proceso de transición política e económica nin liberalización. En Cuba hai unha actualización do seu modelo económico e social”, dixo.
Senra considera que “o bloqueo imposto por Estados Unidos contra Cuba limitou durante anos o pleno desenvolvemento do seu pobo e os vínculos coa UE, en gran medida polo seu carácter extraterritorial” e “en canto aos dereitos humanos, existe un diálogo a través do cal ambas as partes discutiron sobre bases de igualdade e respecto mutuos, pero a UE non está en posición de cuestionar a Cuba nestes temas”, dixo.
Fronte a isto, Senra fixo fincapé no que xa leva esta semana repetindo varias veces no pleno do Parlamento Europeo. “Arranxemos primeiro a nosa casa, miremos cara á vulneración dos Dereitos Humanos que se está a dar na UE. No Estado Español, hai sindicalistas encarcerados por exercer o dereito a manifestarse; póñense trabas e impedimentos ás persoas xornalistas; o Delegado do Goberno na Galiza recoñece que controlan, fan seguemento e investigan a persoas que asisten regularmente a manifestacións. Isto é unha vulneración do dereito de expresión e manifestación, por non falar xa da Lei Mordaza, ampliamente cuestionada, ou das políticas de austeridade que vulneran o dereito á saúde, á ensinanza ou á vivenda, e atacan os dereitos sociais e laborais. E a pesar de todo isto, que está pasando no Estado español e na UE… aínda nos atrevemos a dar leccións de dereitos humanos aos demais?”, criticou a deputada.
“A UE non ten ningunha lexitimidade para iso. E debe respectar os principios básicos de soberanía, independencia e autodeterminación do poblo cubano”, concluiu Lídia Senra, quen hoxe pola mañá tamén participou nunha acción fotográfica organizada polo GUE/NGL no Parlamento Europeo para denunciar o bloqueo de EEUU contra Cuba.
