- A eurodeputada galega pregúntalle á CE se ten constancia dos cheiros e vertidos de lixo ao mar que xera a nova estación en fase de probas
- Pregúntalle á institución comunitaria se pensa avaliar o mal uso dos fondos FEDER que se está a facer con esta instalación deficiente
Santiago,28 de decembro do 2016. Lídia Senra, eurodeputada de Alternativa Galega de Esquerda en Europa (AGEe), integrada no Grupo Confederal da Esquerda Unitaria Europea/Esquerda Verde Nórdica (GUE/NGL), ven de denunciar no Parlamento Europeo as deficiencias e o mal funcionamento da Estación Depuradora de Augas Residuais (EDAR) de Ribeira, instalacións que se atopan actualmente en período de probas. Lídia Senra rexistrou en Bruxelas unha pregunta por escrito dirixida á Comisión Europea na que informa á institución comunitaria do proxecto que se ven desenvolvendo no concello de Ribeira desde o ano 2014, cando a Sociedade Estatatal ACUAES comezou a executar a obra da EDAR, no marco dun convenio asinado entre o Goberno do Estado español e a Xunta da Galicia, e financiada con fondos europeos FEDER.
A eurodeputada galega, que estivo a primeira fin de semana de decembro en Ribeira visitando a zona e escoitando as queixas da veciñanza, afirma agora ante a UE que desde que este agosto rematou a construción e se puxo en marcha a fase de proba da EDAR, “as persoas que viven nos lugares de Ribeira, Castiñeiras, Aguiño e Couso denuncian malos cheiros provocados pola emisión de sulfrídico nas estacións de bombeo; e tamén os vertidos de lixo e de augas que non están debidamente depuradas ao mar, desembocando nunha zona situada entre dous Parques Naturais como son o de Corrubedo e o das Illas Atlánticas”.
Tendo en conta que Ribeira é un dos 17 lugares do Estado español que a CE denunciou ante o Tribunal de Xustiza da Unión Europea por incumprir reiteradamente as normas de recollida e tratamiento de augas residuales, Lídia Senra quere poñer en coñecemento da institución europea a situación que se está a dar coa nova depuradora e que a todas luces parece seguir a non cumprir coa lei e co que sería desexable para o respecto da vida humana e do medio ambiente. “Ten constancia a Comisión do mal funcionamento desta nova estación?”, pregunta por escrito a eurodeputada galega á CE. “E realiza algún seguemento do axeitado ou non axeitado uso de fondos europeos que se están a empregar para esta instalación?”, engade Lídia Senra. A representante de AGEe tamén se interesa por saber se a CE ten prevista algunha medida correctora para resolver a esperpéntica situación que prevé que a EDAR de Ribeira rebordará á ría de Arousa dez veces ao ano, como asegura o Concello.
