- Intervención realizada en Sesión Plenaria do Parlamento Europeo na quenda de minuto de intervención libre, onte en Estrasburgo
- Senra cualifica o Álvaro Cunqueiro de “exemplo de caos e precarización” provocado pola privatización da Sanidade
Estrasburgo, 06 Outubro 2015. A eurodeputada de Alternativa Galega de Esquerda en Europa (AGEe), Lídia Senra, sinalou onte na súa intervención ao recentemente inaugurado centro hospitalario Álvaro Cunqueiro de Vigo como “un claro exemplo do caos e a precarización que conleva a privatización da sanidade na Galiza”.
A eurodeputada de AGEe exemplificou a inoperancia na planificación da actividade deste hospital en relación aos recursos hospitalarios existentes na cidade olívica, subliñando que, lonxe de incrementar a capacidade de atención sanitaria, como contrapartida á apertura deste centro o Goberno de Núñez Feijoo reaccionou pechando tres hospitais, “o que supón que o número de camas sexa o mesmo e que as urxencias hospitalarias estean totalmente colapsadas”.
Asemade, ao fío das reivindicacións laborais levadas adiante por colectivos profesionais como o de enfermería e celadores/as, Senra destacou a privatización “total” dos servizos non sanitarios e de parte das funcións dos/as celadores/as, que ten como consecuencia “unha perda de calidade moi grande nos servizos e tamén a supresión dun grande número de postos de traballo”. Tamén deu a coñecer á Comisión a característica do polémico aparcadoiro privado, a través do cal “obrígase a tódalas usuarias e usuarios, e a unha parte do persoal, a pagar por estacionar os seus vehículos cando chegan ao hospital”.
A eurodeputada galega finalizou a súa intervención facendo “unha chamada” á Comisión Europea “para que poña fin ás políticas de austeridade”, instándoa a “deixar de poñer en perigo a saúde e a vida das persoas; porque a austeridade, mata.”
Intervención en Sesión Plenaria: https://www.youtube.com/watch?v=WwyPnqVo8k0&feature=youtu.be
