- A candidata de En Marea: Compromiso por Europa salienta a importancia destas eleccións europeas, tendo en conta que o 80% das decisións políticas que afectan á vida diaria dos galegos e galegos tómanse na Unión Europea
- Preséntase aos comicios do 26 de maio co obxectivo de dar continuidade ao traballo feito nos últimos 5 anos e seguir acheando ao Parlamento Europeo a voz dos colectivos organizados no noso país
Santiago, 09 de maio de 2019. A eurodeputada galega e candidata de En Marea: Compromiso por Europa (CPE) ás eleccións europeas do 26 de maio, Lídia Senra, defendeu hoxe como necesidade prioritaria que se estableza unha renda básica universal a nivel europeo. “Urxe unha UE na que se reparta a riqueza e se combata a pobreza. A UE ten os suficientes recursos como para que ningunha persoa viva na pobreza, como para que ningunha persoa estea sen un teito debaixo do que vivir ou sen poder alimentarse correctamente. O establecemento da renda básica universal a nivel europeo é prioritario. Débese actuar en materia laboral para lograr uns salarios dignos que permitan a todas as persoas afrontar a vida de forma digna, e para blindar unhas pensións públicas e decentes”.
Senra mantivo esta mañá un almorzo informativo en Santiago, acompañada polo voceiro de En Marea, Luís Villares, onde deu a coñecer cales serán as súas prioridades de traballo. “É necesario facer fincapé na importancia que teñen as eleccións europeas. Normalmente. como as institucións europeas están moi lonxe, a maioría da cidadanía tende a pensar que non teñen tanta importancia. A realidade é que ao redor do 80% das decisións políticas que afectan á nosa vida diaria, á vida dos galegos e galegas, tómanse na UE, a través de políticas como a PAC (Política Agrícola Común) ou a PPC (Política Pesqueira Común), que notan ben os agricultores e agricultoras e o sector da pesca artesanal cando chegan os recortes das cotas pesqueiras, por exemplo. Por iso, debemos reflexionar, facer unha chamada ás persoas para que o 26M depositen o seu voto non só nas eleccións muncipais, senón tamén nas eleccións europeas”, defendeu.
A candidata dixo asumir o reto de presentarse novamente ás eleccións porque “nos parece importante dar continuidade ao traballo que se veu facendo nestes 5 anos, esa aposta de achegar ao Parlamento Europeo a voz e as problemáticas da cidadanía galega e de todos os colectivos que se organizan no país, que teñen que ver co medio, coa defensa da vida digna, do emprego, etc”.
Os eixos do traballo para estes próximos 5 anos serán continuar con políticas moi concretas nas que se está traballando xa. Neste mandato abriuse o debate e están xa enriba da mesa os regulamentos para a reforma da PAC 2021-2027. Están aprobados os textos xa na Comisión de Agricultura, pero no próximo mandato, os deputados e deputadas que formen o Parlamento terán que tomar a decisión final para aprobar definitivamente a nova PAC. “A proposta resultante da Comisión de agricultura non nos gusta e darémoslle unha orientación totalmente diferente”, explicou Senra.
Outra das cuestións que quedou enriba da mesa é o regulamento do control de pesca. “En nome da PPC estanse facendo reformas que aínda que usan como argumento favorecer á pesca artesanal, o certo é que a PPC está levando a poñer cada vez máis trabas á pesca artesanal e de pequena escala. É un regulamento que ou ten que ser retirado ou ten que haber un compromiso específico de que non vai afectar á pesca artesanal”, dixo.
Lídia Senra tamén avanzou que loitará contra a redución dos salarios e por uns prezos dignos agrícolas que cubran os costes de produción. “Débense reforzar os servizos públicos e de calidade e acabar coa precarización dos traballadores e traballadoras e das administracións públicas. Neste sentido, quero amosar todo o meu apoio ao colectivo de enfermeiras eventuais que están en loita e que o próximo domingo teñen unha acción de protesta nesas oposicións, apoio a todos os traballadores e traballadoras en precario”, afirmou.
Frear o cambio climático tamén é para a candidata unha loita imprescindible. “Hai que cumprir os compromisos dos Acordos de París para reducir as emisións, pero que ninguén pense que con moitas medidas cosméticas se resolve o problema. Hai que ir ao fondo, aos modelos de desenvolemento e á redución do consumo de enerxía”, defende.
Outro dos eixos principais do traballo de Senra seguirá sendo o compromiso coa igualdade. “Seguiremos dando a batalla para que se respecten os dereitos das mulleres. Urxe poñer en marcha unha directiva europea para erradicar a violencia machista”.
Así mesmo, reclamou que se cambie o Mecanismo Financieiro Plurianual. “Non compartimos as prioridades que establece a UE en canto ao reforzo armamentístico ou a construción dun exército europeo. Os orzamentos teñen que ir para construir a cultura de paz e garantir os servizos públicos”, zanxou.
Senra levará a cabo unha campaña electoral centrada sobre todo en encontros directos con colectivos por todo o país.
