- A asociación Petón do Lobo denunciou onte no Parlamento Europeo o emprego incorrecto de fondos europeos na política forestal galega
- Representantes do PP español, con Millán Mon á fronte, acudiron á Comisión de Peticións para impedir que a UE investigue esta situación
Bruxelas, 21 de Febreiro de 2019. Máis da metade da superficie queimada no Estado español está na Galiza, onde se produce un 70% de tódolos incendios. A Comisión de Peticións do Parlamento Europeo acolleu na tarde de onte a denuncia de Ismael López en nome da Asociación Petón do Lobo ao respecto desta problemática. As propostas sobre as que a Comisión de Peticións do Parlamento Europeo tiña que posicionarse eran manter aberta a petición pedindo máis información ás autoridades galegas e/ou estatais a fin de investigar esta situación e organizar unha visita de europarlamentarias/os a Galiza para comprobar in situ o que está a pasar, ou pechar a petición.
Esta decisión sométese ao voto dos/as eurodeputados/as presentes. O deputado galego do Partido Popular Francisco Millán Mon e o grupo de eurodeputadas/os do Partido Popular votaron en contra de que esta petición ficara aberta. Malia a que distintos grupos políticos votaron a favor da mesma, ao ter maioría o PP logrou cubrirlle as costas á Xunta ante unha posíbel investigación da Unión Europea sobre os verdadeiros motivos que fan que o noso País arda ano tras ano. Unha vez máis, comprobamos como o Partido Popular antepón os intereses de empresas como ENCE, Greenalia, etc. aos dereitos sociais, económicos e ambientais do pobo galego.
Uns minutos antes, na súa intervención a Asociación Petón do Lobo denunciara que a Xunta de Galicia malgastou os fondos FEDER -Fondo Europeo de Desenvolvemento Rexional- destinados á prevención de riscos e á xestión de incendios forestais no periodo2014-2020, subliñando ademais a falta de transparencia do Goberno galego no referente á información sobre superficies queimadas e aos custos dos plans de extinción de incendios. Dende o ano 2009 a Xunta só informa á poboación cando os incendios xa calcinaron máis de 20 hectáreas, un dos motivos polos cales, malia a que os datos oficiais falan dun menor número de incendios, a superficie queimada é maior que en anos precedentes.
López pediu tamén que se aborden as causas estruturais dos lumes e non unicamente a extinción, incrementando a inversión en prevención, avaliando os riscos que existen actualmente no monte galego e revisando os obxectivos do plan forestal da Xunta, que data do ano 1992. “A Xunta aplica un Plan forestal obsoleto, caduco, que parte dun diagnóstico da realidade que fai xa tempo que non está vixente. Vai seguir a Comisión despilfarrando fondos comunitarios dándollos á Xunta de Galicia, que non só non fai nada para solucionar os problemas estruturais do monte senón que centra todos os seus recursos no “negocio” da extinción?”, cuestionou o representante da Asociación Petón do Lobo.
Diante desta situación, solicitou ao Parlamento e á Comisión que instasen á Xunta de Galicia a establecer unha moratoria indefinida para novas plantacións de especies do xénero Eucalyptus e a prohibición do cultivo do Eucalyptus nitens. “A Administración debera establecer medidas para a progresiva erradicación destas especies en todo o territorio, con especial atención aos espazos naturais e ás terras agrarias, ademais de prohibir que se repoboe con ningunha das especies do xénero Eucalyptus na Rede galega de espazos protexidos, así como incrementar a xestión pública dos montes e a protección dos montes veciñais en man común”, ao tempo que subliñou que namentras a Xunta non mude o seu modelo de xestión forestal as institucións europeas estarán a ser “cómprices da destrución do monte galego” .
A eurodeputada galega do Grupo da Esquerda Unitaria Europea-Esquerda Verde Nórdica (GUE/NGL) Lídia Senra tomou a palabra na Comisión de Peticións para secundar as denuncias trasladadas por Ismael López, abondando en que ademais da eucaliptización tamén o abandono do medio rural -en grande parte vinculado ao tipo de medidas que impulsa a Política Agraria Común- pon en risco os nosos montes. “Está ampliamente demostrado que onde hai labregas/os e animais pacendo e limpando os montes o lume, se prende, non avanza”, reiterou.
Senra pediu ademais que a Comisión realice “un seguimento estrito dos dous millóns de euros concedidos para substituír eucaliptos por frondosas, porque a realidade é que o propio Goberno galego está vulnerando a súa normativa”, situación que corroborou ensinando unha fotografía de xaneiro deste ano na que se podía apreciar unha superficie de bosque autóctono da Terra de Lemos pinchada e substituída por eucaliptos, malia a que segundo os propios modelos silvícolas da Xunta debería estar prohibido.
“Pódese afirmar que a Xunta de Galicia promove un modelo forestal altamente inflamábel contrario aos obxectivos de loita contra o cambio climático”, alertou, xa que a propia Comisión recoñece que a plantación de especies arbóreas forestais moi inflamábeis -e o eucalipto éo- facilitan a ignición e favorecen la propagación de los incendios. “A pasividade das autoridades galegas é total”, denunciou Senra, “os fondos públicos, diñeiro das e dos contribuíntes europeos e europeas, non está sendo empregado correctamente se a Xunta segue a permitir plantar especies altamente inflamábeis.”
“Dende o noso punto de vista a Comisión e o Parlamento deberían de pronunciarse ao respecto de se están dispostos a sacrificar o emprego, a biodiversidade e a economía da Galiza, permitindo o monocultivo de eucalipto, e tamén se esta opción ten algo que ver co abastecemento da planta de biomasa que Greenalia pretende construír en Teixeiro por riba dos dereitos sociais e medioambientais do pobo galego”, apuntou.
A eurodeputada galega tamén informou á Comisión da grave situación de precarización que padecen as persoas que traballan nas labouras de prevención e extinción, ao tempo que chamou a atención sobre o feito de que a externalización deste servizo a empresas privadas está sendo máis cara que a contratación directa da propia Administración pública. “Queremos que o operativo de loita contra o lume sexa único, público e profesionalizado”, reivindicou.
“A Xunta está a manter un modelo de resultados pésimos. E as institucións europeas deberían investigar o motivo, xa que para manter ese sistema estanse empregando fondos comunitarios. A contratación de medios aéreos, por exemplo, está a ser investigada pola audiencia nacional por unha suposta relación entre administracións e empresas adxudicatarias, e tamén polo posíbel pacto de prezos para repartirse as adxudicacións no Estado español”.
Finalmente, logo da intervención do representante da Asociación Petón do Lobo, de Lídia Senra e doutros deputados e deputadas presentes na sala que secundaron os argumentos expostos polo peticionario Ismael López, os deputados/as do Partido Popular español presentes nese momento no Comité de Peticións votaron en contra de que a UE afondase na investigación desta situación.
Votos:
Intervención final de Ismael López en representación da asociación Petón do Lobo:
Debate completo:
Imaxe de portada: La Sexta, lumes en Galiza 2017.
